Վրաստանի Հայ Համայնքի ներկայացուցիչը՝ Հայոց ցեղասպանության 109-րդ տարելիցի միջոցառումների մասին

Վրաստանի Հայ Համայնքի ներկայացուցիչ Արթուր Միրզոյանը ներկայացնում է Հայոց ցեղասպանության 109-րդ տարելիցի միջոցառումների մասին՝ նշելով․

«Մոտենում է Հայոց ցեղասպանության 109-դ տարելիցը: Ավանդաբար, աշխարհի բազմաթիվ երկրներում ամեն տարի ապրիլ աամսին տեղի են ունենում մի շարք միջոցառումներ՝ նվիրված Հայոց ցեղասպանությանը, այդ թվում՝ ջահերով երթեր և ինչպես նաև խաղաղ երթ՝ ցույց Թուրքիայի դեսպանատների առջև։ Ինչպես գիտեք, Թբիլիսին բացառություն չէ, և 2005 թվականից նշված միջոցառումներն անցկացվում են նաև Թբիլիսիում։

Մասնավորապես, կարևորում ենք երթը դեպի Վրաստանում Թուրքիայի դեսպանատուն, ջահերով երթը ապրիլի 23-ին և Հայոց ցեղասպանությանը նվիրված ցուցահանդեսները, որոնք ավանդաբար անցկացվում են ապրիլ ամսվա ընթացքում Վրաստանի խորհրդարանի շենքի հարակից տարածքում և մայրաքաղաքի տարբեր հատվածներում։

Հաշվի առնելով վերջին մի քանի օրվա ընթացքում մայրաքաղաքում խորհրդարանի դիմաց ծավալված իրադարձությունները, մասնավորապես, հաշվի առնելով ամենօրյա ռեժիմով տեղի ունեցող բազմաթիվ հանրահավաքները, բացառության կարգով որոշվել է ծրագրում կատարել մի շարք փոփոխություններ.

Հասկանալի պատճառներով այս տարի խորհրդարանի դիմաց ցուցահանդես չի իրականացվի:

Ապրիլի 23-ին նախատեսված միջոցառումները մնում են անփոփոխ։

Մասնավորապես, ժամը 19:15-ին «Իսանի» մետրոյի կայարանի հարակից տարածքից՝ Քեթևան Դեդոփալի պողոտայով, Հավլաբարիում գտնվող Սուրբ Էջմիածին եկեղեցու ուղղությամբ տեղի կունենա ջահերով երթ, որտեղ ծաղիկներ կխոնարհենք հայոց ցեղասպանությանը նվիրված խաչքարի մոտ և հարգանքի տուրք կմատուցենք անմեղ զոհերի հիշատակին։

Հաշվի առնելով վերջին օրերին մայրաքաղաքում տեղի ունեցած բազմաթիվ հանրահավաքների հետևանքով իրավապահ մարմինների գերզբաղվածությունը, բացառության կարգով այս տարի, որոշվել է չեղարկել ֆիլհարմոնիայի հարակից տարածքից երթը և հավաքը անցկացնել անմիջապես Թուրքիայի դեսպանատան հարակից տարածքում, որտեղ նաև կանցկացվի ցուցահանդես:

• Ժամը 12:00-ին Վիրահայոց թեմի Սուրբ Գևորգ առաջնորդանիստ եկեղեցում` Թեմակալ առաջնորդ Գերաշնորհ Տեր Կիրակոս եպիսկոպոս Դավթյանի հանդիսապետությամբ, կկատարվի բարեխոսական կարգ` ի հիշատակ հավատքի և հայրենիքի համար զոհված Հայոց Ցեղասպանության Սուրբ նահատակների։
• Ժամը 13:00-ին Վրաստանում Թուրքիայի դեսպանատան հարակից տարածքում կսկսվի Հայոց ցեղասպանությանը նվիրված ցուցահանդես։
• Ժամը 14:00-ին Վրաստանում Թուրքիայի դեսպանատան հարակից տարածքում կսկսվի պահանջատիրական ցույց»։