8-րդ անհաջող փորձը. Լիբանանի խորհրդարանը դարձյալ չկարողացավ երկրի նախագահ ընտրել

Լիբանանի խորհրդարանին դարձյալ չի հաջողվել ընտրել երկրի նախագահ Միշել Սուլեյմանի հաջորդին: Այս մասին հայտնում է BBC-ն` հիշեցնելով, որ Սուլեյմանը պաշտոնը լքել է մայիսին:

Խորհրդարանի խոսնակի խոսքով` ինքը ստիպված էր հետաձգել քվեարկությունը, քանի որ օրենսդիրները քվորում չէին ապահովել: Սա Լիբանանի խորհրդարանի արդեն 8-րդ փորձն է` ընտրել երկրի նոր ղեկավարի:

Վերլուծաբանների կարծիքով` փակուղային իրավիճակի պատճառներից մեկն այն է, որ իրար հետ մրցակցող Իրանը և Սաուդյան Արաբիան Լիբանանի խորհրդարանում աջակցում են տարբեր խմբակցությունների: Լիբանանը նաև խնդիրներ ունի` պայմանավորված երկրում անվտանգության ապահովմամբ և հարևան Սիրիայից պատերազմի հետևանքով մոտ 1 միլիոն փախստականի ներհոսքով: