Գերմանիայի խորհրդարանը նոր նախագահ է ընտրել

Նոր գումարման Բունդեսթագի (Գերմանիայի խորհրդարան) նախագահի պաշտոնում ընտրվել է Գյուղատնտեսության նախկին դաշնային նախարար, Քրիստոնեա-դեմոկրատական ​​միության (ՔԴՄ) անդամ Յուլիա Կլյոկները։ Այդ մասին տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն։

«Կողմ է քվեարկել 382 պատգամավոր, դեմ՝ 204, ձեռնպահ՝ 31 պատգամավոր։ Այսպիսով, նա ընտրվել է Գերմանիայի 21-րդ Բունդեսթագի նախագահ»,- ասել է «Ձախերի» կուսակցության խորհրդարանական խմբի անդամ Գրեգոր Գիզին։

«Ես հաճույքով ընդունում եմ այս պաշտոնը և շնորհակալ եմ ձեր ձայների և վստահության համար», - ասել է Կլյոկները:

Այս պաշտոնում Կլյոկների նախորդը Գերմանիայի սոցիալ-դեմոկրատական ​​կուսակցության պատգամավոր Բերբել Բասն էր։

Այսօր տեղի ունեցավ նոր՝ քսանմեկերորդ գումարման Բունդեսթագի առաջին հիմնադիր նիստը։ Նոր Բունդեսթագում, մանդատների առավելագույն քանակի մասին օրենքում կատարված վերջին փոփոխությունների համաձայն, կաշխատեն 630 պատգամավորներ։