ԱՄՆ փոքրիկ քաղաքում կատարված հանցագործությունը վրդովեցրել ու հիասթափեցրել է բնակիչներին

ԱՄՆ Սալեմ փոքրիկ քաղաքում «ՄաքԴոնալդսի» աշխատակից` 25-ամյա Լաթիա Հարիսն ինքնակամ ներկայացել է ոստիկանություն և ձերբակալվել: Myfoxphilly.com-ի տեղեկացմամբ` նա մեղադրվում է «ՄաքԴոնալդսի» մեկ այլ աշխատակցի` 27-ամյա Քեթրին Ֆերիրային վերջինի 2 տարեկան որդու առջև դաժանաբար ծեծելու և վնասվածքներ պատճառելու մեջ: Միջադեպին ականատես են եղել նաև անցորդներ, ովքեր նկարահանել են ծեծը:

Ֆերիրան պատմել է, որ ոչ ոք չի օգնել իրեն, բացի որդուց, ով ոտքով մի քանի անգամ հարվածել է Հարիսին` փորձելով այդպիսով կանգնեցնել նրան: Դատարան տարվելու ճանապարհին Հարիսը հրաժարվել է պատասխանել լրագրողների հարցերին:

«Մենք մի քանի օր փնտրում էինք օրիորդ Հարիսին: Կարծում եմ` ոստիկաններն իսկապես պարզել էին նրա գտնվելու վայրը: Նա որևէ այլ ընտրություն չուներ, քան ինքնակամ հանձնվելը»,- ասել է Սալեմի ոստիկանապետ Ջոն Փելուրան:

Հարիսի և Ֆերիրայի գործընկեր Քելլի ՄաքԼուգլինը պատմել է, որ դաժան ծեծի վերաճած միջադեպը ծագել է աշխատանքային սովորական անհամաձայնությունից:

Հանցագործության տեսանյութն առաջացրել է Սալեմի բնակիչներից շատերի վրդովմունքը: Շատերը հիասթափված են, որ միջադեպի ականատես ավելի քան 10 անցորդից որևէ մեկը չի օգնել կնոջը և ոչ էլ ոստիկանություն է կանչել: Սակայն դատախազները հրաժարվել են մեղադրանքներ ներկայացնել նաև անցորդներին: