Կոկոյտին հիասթափեցրել է Մոսկվային

Հարավային Օսիայի նախագահական ընտրությունների մրցարշավում Մոսկվայի ֆավորիտը ոչ թե գործող նախագահ Էդուարդ Կոկոյտիի ընտրյալն է, այլ արտակարգ իրավիճակների նախարար Անատոլի Բիբիլովը. տեղեկացնում է Gazeta.ru-ն:

Նախագահական ընտրությունների ամսաթիվն արդեն հայտնի է. խորհրդարանը միաձայն հաստատել է, որ ընտրություններն անցկացվելու են նոյեմբերի 13-ին:

Հաշվի առնելով այն, որ 2001 թվականից Կոկոյտին նախագահ է, եւ լրանում է նրա` նախագահ ընտրվելու երկրորդ ժամկետը, ապա նրա թեկնածությունն այլեւս առաջադրվել չի կարող:

Gazeta.ru-ի աղբյուրը նշել է, որ մինչեւ վերջերս ռուս պաշտոնյաները չէին խոսում, թե հատկապես ում են աջակցելու: Այս թեմայով քննարկումներ են եղել ամռան ընթացքում, եւ Անատոլի Բիբիլովին աջակցելու վերաբերյալ վերջնական որոշումն ընդունվել է օգոստոսին:

Նույն աղբյուրի հավաստմամբ` Մոսկվան պատրաստ է եղել աջակցել ցանկացած մեկին, ում անունը կասեր Կոկոյտին:  Սակայն վերջին շրջանում նա չարաշահել է Մոսկվայի վստահությունը եւ հիասթափեցրել նրան: