Եթե ամեն բան ժողովուրդը պետք է որոշի, էլ ինչի՞ համար են ԱԺ-ն ու կառավարությունը. Գևորգ Պետրոսյան

Ազգային ժողովի «Բարգավաճ Հայաստան» խմբակցության պատգամավոր Գևորգ Պետրոսյանին այսօր լրագրողները հարց տվեցին Ամուլսարի հանքավայրի վերաբերյալ: Պատգամավորն ասաց, որ մասնագիտական դատողություններ անել չի կարող, բայց կխոսի հարցի քաղաքական կողմի մասին:

«Պարոն Փաշինյանն առիթը բաց չի թողնում՝ ասելու, որ ժողովուրդն է պետության տերը: Իհարկե, դա ոչ թե Փաշինյանն է ասում, այլ մեկնաբանում է Հայաստանի Սահմանադրության երկրորդ հոդվածը: Միշտ էլ առանձին մեկնիչներ վարչապետի մտքերին տալիս են տարածական մեկնաբանություններ: Ասում են՝ եթե ժողովրդին է պատականում իշխանությունը, ուրեմն ամեն ինչ պետք է ժողովրդը որոշի: Եթե ամեն բան պետք է ժողովուրդը որոշի, էլ ինչի՞ համար է Ազգային ժողովը, էլ ինչի համար է կառավարություն ձևավորվում, ինչու են նախարարներ նշանակվում»,- նշեց նա:

Ըստ պատգամավորի՝ եթե անգամ ընդունենք Փաշինյանի տարբերակը, որ ժողովուրդը հրապարակից պետք է կառավարի երկիրը, ապա, ըստ այդ տրամաբանության, պետք է թողնել, որ ժողովուրդը որոշի Ամուլսարի ճակատագիրը, իսկ ժողովրդի որոշելու  միակ քաղաքակիրթ ճանապարհը հանրաքվեն է:

Գևորգ Պետրոսյանն ընդգծեց՝ ԲՀԿ-ի այն պատգամավորները, որոնք քննարկումներ են ունեցել Ամուլսարի թեմայի շուրջ, դեմ են արտահայտվել՝ շեշտելով, որ Ամուլսարը հանք չպետք է դառնա: