ՀէՑ-ը չափն անցել է, ՀԷՑ-ի արածը լկտիություն է. պահանջում են չթանկացնել էլեկտրաէներգիան

Այսօր էլեկտրաէներգիայի սակագների բարձրացման թեմայով խորհրդարանական լսումների ժամանակ ԱԺ ՀԱԿ խմբակցության ղեկավար Լևոն Զուրաբյանը կարծիք հայտնեց, որ իսկապես խնդիրը մենեջմենթի ձախողումների մեջ է, բայց, չգիտես` ինչու, այդ կորուստների ամբողջ բեռը տեղափոխվում է սպառողի ուսերին:

«Ես այսօր զարմացած եմ` ճիշտն ասած: Այսօր ՀՀԿ մեծամասնությունը ամենամեծ քննադատությունը հասցրեց իրեն, երբ ակնարկեց կոռուպցիոն բացահայտումների մասին: Հերմինե Նաղդալյանի, Վարդան Այվազյանի հայտարարությունները ուղղակի փայլուն էին: Միայն մեկ հարց է ծագում՝ այնպիսի տպավորություն է` կարծես դուք քննադատում եք կարգավորող հանձնաժողովին, այն դեպքում, երբ դուք եք մեղավորն այդ ամեն ինչի: Դուք եք ստեղծել այդ օրենսդրությունը, դուք եք տվել հանձնաժողովին այնպիսի լիազորություններ, որ նա ոչ մի կերպ չի կարողանում մտնել այդ խնդիրների մեջ»,- ասաց Լևոն Զուրաբյանը:

Նրա խոսքով` բոլոր պատգամավորներն ընդունեցին, որ այդ իրավիճակը կոռուպցիայի, վատ մենեջմենթի հետևանք է, բայց ինչո՞ւ են այդ բեռը դնում ժողովրդի վրա: Պատգամավորն առաջարկեց կարգավորող հանձնաժողովին` մերժել հայտը, գինը չփոխել, և թող բոլոր սուբյեկտները, ովքեր մեղավոր են այդ ամենի համար, կրեն պատասխանատվություն:

«Եթե լիներ կառավարման ստաբիլիզացման ֆոնդ, որը ցածր տոկոսներով վարկեր կտար, մենք կկարողանայինք սահուն ստաբիլ պահել գները: Պարոն Նազարյանն էլ ընդունեց, որ սա լավ գաղափար է, և եթե պետք է` կարելի է անել: Փողի տեղն էլ ցույց կտանք` 2013 թվականի դեկտեմբերի 31-ին կառավարությունը իր տրամադրության տակ ունեցել է 189 միլիարդ դրամ, որից 145 միլիարդը դրված է ԿԲ դեպոզիտում»,- ասաց նա:

ՀԱԿ խմբակցության քարտուղար Արամ Մանուկյանն էլ նշեց. «Շահույթի կեսը տալիս եք ճեղքվածքին, հարցը լուծվում է: Ամբողջ երկիրը խառնել եք: Ասում եք` շահույթը` 14 տոկոս, է հիմա թող լինի 8 տոկոս, բայց սպառողը չտուժի: Էլեկտրաէներգիայի թանկացումը բերելու է այլ ապրանքների թանկացման: ՀԷՑ-ը չափն անցել է, ՀԷՑ-ի արածը լկտիություն է, զսպել է պետք, ու հանձնաժողովի դերը հենց սա է»:

Պատգամավորը կարծիք հայտնեց, որ ստեղծված իրավիճակում տեսնում է մութ գործարքներ: Նա նաև նշեց, որ քառյակը շուտով հայտարարություն է անելու` էլեկտրաէներգիայի սակագնի բարձրացման հետ կապված:

«Բնականաբար, դեմ ենք և ամեն ինչ անելու ենք, որ չլինի սակագնի բարձրացում: Ես հորդորում եմ քաղաքական մեծամասնությանը՝ եկեք, փորձենք լուծումներ գտնել` թանկացումն օգոստոսին չիրականացնելու համար»,- եզրափակեց Արամ Մանուկյանը: