Նախընտրել են էլեկտրաէներգիան թանկ վերցնել Հրազդանի ՋԷԿ-ից` կուտակելով պարտքեր

ԱԺ-ում ընթանում են խորհրդարանական լսումներ` էլեկտրաէներգիայի սակագնի բարձրացման հետ կապված:

Հանրային ծառայությունները կարգավորող հանձնաժողովի նախագահ Ռոբերտ Նազարյանը, ներկայացնելով սակագնի բարձրացման հիմնավորումները, նշեց, որ սկսվել է սակագների վերանայման գործընթաց, ներկայացվել են հաշվարկներ ու հիմնավորումներ, և որ սակագների բարձրացումը պայմանավորված է 18,9 մլրդ դրամ ֆինանսական ճեղքվածքով:

Նրա խոսքով` ատոմակայանը 88 օր ավելի ուշ մտավ գործունեության մեջ, և էլեկտրաէներգիայի պահանջարկը ստիպված էին բավարարել Հրազդանի ՋԷԿ-ի արտադրած էլեկտրաէներգիայով: Նա մեկ առ մեկ նշեց էներգետիկ համակարգում աշխատող բոլոր կազմակերպությունների ֆինանսական խնդիրների պատճառները:

ԱԺ ՀՀԿ խմբակցության պատգամավոր Հովհաննես Սահակյանը Ռոբերտ Նազարյանից հետաքրքրվեց, թե ինչո՞ւ ատոմակայանի կանգնելու պատճառով էլեկտրաէներգիան վերցրել են թանկ արժեցող Հրազդանի ՋԷԿ-ից, այլ ոչ առավել էժան էլեկտրաէներգիա արտադրող Երևանի ՋԷԿ-ից:

Ռոբերտ Նազարյանը պատասխանեց, որ Երևանի ՋԷԿ-ից չեն վերցրել, որովհետև այն ամբողջ հզորությամբ արտադրել է էլեկտրաէներգիա և ոչ մի ռեզերվ չի ունեցել, իսկ ամենաթանկ` Հրազդանի ՋԷԿ-ը ուներ շատ ռեզերվներ: