Էլեկտրաէներգիան չհիմնավորված թանկ է. Արամ Մանուկյան

Այսօր ԱԺ նիստում, երբ քննարկվում էր «Էներգետիկայի մասին» ՀՀ օրենքում փոփոխություններ կատարելու մասին օրինագիծը, ԱԺ ՀԱԿ խմբակցության քարտուղար Արամ Մանուկյանը նշեց, որ էլեկտրաէներգիայի գինը չհիմնավորված բարձր է: Գազի գնի վերջին բարձրացումից հետո, ըստ տնտեսագիտական հաշվարկների, էլեկտրաէներգիայի գինը պետք է բարձրանար 1,2 դրամով, այնինչ` հոսանքի գինը բարձրացել է 8 դրամով:

«Այսօր ՀԷՑ-ում միջին աշխատավարձը 250 հազար դրամ է: Ինչի՞ համար, ինչո՞ւ պետք է ՀԷՑ-ը երկու անգամ ավելի աշխատավարձ տա: Հազար հոգի նոր աշխատող է ընդունվել ՀԷՑ: Ինչո՞վ է քաղաքացին մեղավոր, որ սակագները ուռճացվում են, ու քաղաքացին էլ պետք է վճարի այդ գինը, և որ մի քանի հոգի բարձր աշխատավարձ ստանա՞ն»,- ասաց Արամ Մանուկյանը:

Նա նաև նշեց, որ, ըստ մամուլի հրապարակումների, ՀԷՑ-ը ուզում են սնանկացնել ու տալ «Գազպրոմ»-ին: Եվ եթե նման բան տեղի ունենա, ապա հոսանքի համար վճարողը կընկնի սակագների պրեսինգի տակ: