Աղվան Վարդանյանի բանաստեղծությունը ՀՀԿ-ականները ծանր են տարել

Այսօր ԱԺ-ում, երբ հայ-ռուսական միջխորհրդարանական հանձնաժողովի անդամները ամփոփում էին ՌԴ կատարած այցի արդյունքները, հանձնաժողովի անդամ պատգամավորներին` ԱԺ ՀՀԿ խմբակցության անդամներ` ԱԺ փոխխոսնակ Հերմինե Նաղդալյանին ու Հայկ Բաբուխանյանին հարց ուղղեցին լրագրողները, թե ինչ կարծիք ունեն ԱԺ ՀՅԴ խմբակցության քարտուղար Աղվան Վարդանյանի այն բանաստեղծության մասին, որը խորհրդարանական ճեպազրույցների ժամանակ նա նվիրեց Կիսելյովին պաշտպանողներին:

Հերմինե Նաղդալյանը նշեց, որ Աղվան Վարդանյանին առիթ էր անհրաժեշտ 1987-ին գրված բանաստեղծությունը ևս մեկ անգամ հիշեցնելու, որ ինքը նման բանաստեղծություն ունի, և Կիսելյովի առիթով էլ հիշել է այն:

«Մեր ընդդիմադիր գործընկերները երևի ուրիշ թեմա չունեին: Փաստորեն, Կիսելյովը ժամանակին եկավ, որ նրանց համար թեմա բացվի, և մեր ընդդիմադիր գործընկերները փորձեն տարբեր դիվիդենդներ քաղել, օգուտներ քաղել դրանից: Բայց դա մեկ բաժակ ջրում փոթորիկ էր: Չեմ ուզում Կիսելյովի թեման արժևորել, մենք մեր քաղաքականությունը համարում ենք հայանպաստ և հայակենտրոն, Հանրապետական կուսակցությունը` որպես ազգային արժեքներով առաջնորդվող կուսակցություն, հայոց լեզուն մեր աղոթքն է համարում»,- ասաց Հերմինե Նաղդալյանը:

Նրա խոսքով` մասնավոր զրույցներով չեն պայմանավորված հայ-ռուսական ռազմավարական հարաբերությունները: «Մենք Ռուսաստանին համարում ենք ռազմավարական դաշնակից, մենք բազմաթիվ այդպիսի կիսելյովների տվել ենք թե' պաշտոնական, թե' ոչ պաշտոնական պատասխան»,- ասաց Հերմինե Նաղդալյանը:

Հայկ Բաբուխանյանն էլ խոսեց. «Հետո էլ ընդդիմությունը զարմանում է, թե ինչո՞ւ է ժողովուրդն իր ձայնը տալիս ոչ թե ընդդիմությանը, այլ ՀՀԿ-ին: Հասարակությունն ասում է, որ եթե այդպիսին է ընդդիմությունը, ուրեմն այլևս նրան ձայն չեն տա, որովհետև ՀՀԿ-ն է, որ կայուն ձևով պահպանում է հայ-ռուսական հարաբերությունները»: