Խոշոր ավտովթար` Երևանում. 1 զոհ, 3 վիրավոր

Հունիսի 14-ին` ժամը 02.55-ին, տեղեկություն է ստացվել, որ Երևանի Մարգարյան-Ֆուչիկ փողոցների խաչմերուկում տեղի է ունեցել ճանապարհատրանսպորտային պատահար, կան տուժածներ, անհրաժեշտ է փրկարարների օգնությունը: Դեպքի վայր է մեկնել մեկ մարտական հաշվարկ, ճգնաժամային կառավարման կենտրոնի օպերատիվ և հատուկ փրկարարական ջոկատի հերթապահ խմբերը:

Պարզվել է, որ բախվել են «ԲՄՎ»  և «Լեքսուս» մակնիշի ավտոմեքենաները, ինչի հետևանքով «Լեքսուսը» շրջվել է, առկա է գազի արտահոսք: Հրշեջ-փրկարարները ավտոմեքենաներից դուրս են բերել 1991թ. ծնված Ս. Մ.-ին, 1992թ. ծնված Տ. Զ.-ին և 1992թ. ծնված Գ. Խ.-ին, ովքեր տարբեր աստիճանի մարմնական վնասվածքներով հոսպիտալացվել են «Արմենիա» բժշկական կենտրոն: Բժիշկները տուժածների առողջական վիճակը գնահատել են ծանր:

Փրկարարները «Լեքսուս» ավտոմեքենայից դուրս են բերել անձը չպարզված տղամարդու (20-25 տարեկան) դի:

Հրշեջ-փրկարարները հոսանքազրկել են ավտոմեքենաները, դադարեցրել գազի արտահոսքը և կատարել ճանապարհահատվածի լվացման աշխատանքներ: Այս մասին հայտնում է արտակարգ իրավիճակների նախարարությունը: