Ըստ Շարմազանովի` պետք չէ աժիոտաժ սարքել Ալիեւի նամակից

ՀՀ-ն եւ ԼՂՀ-ն մեկ միասնական տնտեսական տարածքում են, այդպես էլ կլինի, դա անհերքելի է. լրագրողների հետ զրույցում հայտարարեց ՀՀԿ խոսնակ, ԱԺ փոխնախագահ Էդուարդ Շարմազանովը:

Ըստ Շարմազանովի` ՀՀ-ն Եվրասիական տնտեսական միությանը կմիանա երեկ Աստանայում հիշատակված ժամանակահատվածում՝ մինչեւ հունիսի վերջը, եւ մնացած հարցերը զուտ տեխնիկական են եւ սահմանների հետ ոչ մի կապ չունեն:

«ՄՄ-ն և ԵՏՄ-ն այն կազմակերությունները չեն, որոնք ճշգրտելու կամ քննարկելու են սահմանների հարցը»,- ընդգծեց Շարմազանովը եւ նշեց, որ ԼՂՀ-ի հարցը լուծելու համար կա Մինսկի խմբի ձևաչափը:

Նա հորդորեց «աժիոտաժ» չսարքել Ալիեւի երեկվա նամակից: «Կարիք չկա դրանից մի մեծ փուչիկ փչել ու ուռեցնել: ՀՀ-ն չի անելու մի քայլ, որը կվնասի Արցախի Հանրապետությանը, ՀՀ-ն համարվել և համարվում է Արցախի Հանրապետության անվտանգության երաշխավորը»,- վստահեցրեց Շարմազանովը: