Ես հայ եմ և հպարտ եմ դրա համար. Արթուր Միրանյան

Արդեն տեղեկացրել ենք, որ Դոնեցկի «Շախտյոր»-ի երիտասարդական թիմի կիսապաշտպան Արթուր Միրանյանը, ով հրավեր էր ստացել ազգային հավաքականի գլխավոր մարզչից,  այս գիշեր ժամանել է Հայաստան: Yerkir.am-ը կարճ զրույց ունեցավ երիտասարդ ֆուտբոլիստի հետ:

-Արթու՛ր, ինչպիսի՞ զգացողություններ ունես Հայաստան ժամանելուց հետո:

-Ամեն ինչ շատ լավ է այստեղ: Հայաստանում եղել եմ նաև մի քանի ամիս առաջ, սակայն այս անգամ օդանավակայանում ես արժանացա ջերմ ընդունելության երկրպագուների կողմից, ինչը մեծ անակնկալ էր ինձ համար: Շատ շնորհակալ եմ նրանցից:  

-Որտե՞ղ ես սկսել առաջին քայլերդ ֆուտբոլում:

-Ընտանիքով տեղափոխվել ենք Ուկրաինա, երբ ես փոքր էի: Առաջին քայլերս սկսել եմ Դոնեցկի «Շախտյոր»-ի դպրոցում:

-Շատ է խոսվում այն մասին, որ հավաքականում քո հանդես գալը դուր չի գալիս ակումբի ղեկավարությանը, ի՞նչ կասես այս մասին:

-Շատ մարդկանց կարող է դուր չգալ, բայց իմ երազանքն է խաղալ ազգային հավաքականում: Ես հայ եմ և հպարտ եմ դրա համար:

-Ինչպե՞ս ես գնահատում մեր հավաքականի շանսերը ԵՎՐՈ 2016-ի ընտրական փուլում:

 -Մենք ունենք շատ լավ մարզիչ և հիանալի ֆուտբոլիստներ: Մեծ շանսեր ունենք, հուսով եմ` լավ հանդես կգանք:

-Հավաքականի ֆուտբոլիստներից ո՞ւմ հետ ես մտերիմ:

-Շուտով բոլորի հետ էլ կմտերմանամ: Այժմ մտերիմ եմ միայն Հենրիխ Մխիթարյանի և Արտյոմ Սիմոնյանի հետ:

Երվանդ ՀԱԿՈԲՅԱՆ