Հպարտ եմ, որ խաղում եմ իմ ազգի համար. Արթուր Միրանյան

Արդեն տեղեկացրել ենք, որ ԵՎՐՈ-2015-ի երիտասարդական առաջնության  ընտրական փուլում Հայաստանի երիտասարդական հավաքականն իր վերջին խաղում 2:1 հաշվով առավելության է հասել Բելառուսի նկատմամբ: Այդ խաղում Հայաստանի հավաքականի կազմում իր նորամուտն է նշել Դոնեցկի «Շախտյոր»-ի երիտասարդական թիմի նախկին հարձակվող Արթուր Միրանյանը, ով վերջերս պայմանագիր է կնքել մակեդոնական «Վարդար»-ի հետ:

Հայաստան-Բելառուս խաղից հետո Yerkir.am-ի թղթակիցի հետ  զրույցում 19-ամյա ֆուտբոլիստը խոսեց իր տպավորությունների մասին. «Շատ ուրախ եմ, որ հանդես եկա Հայաստանի հավաքականի կազմում:  Հպարտ եմ, որ խաղում եմ իմ ազգի համար: Բառերով չեմ կարող նկարագրել թե ինչ զգացողություններ եմ ապրում: Մեծ ցանկություն ունեի` գոլ խփելու, սակայն չստացվեց: Կարևորը՝ կարողացանք հաղթանակ տոնել»:

Ֆուտբոլիստը խոսեց նաև նոր թիմի մասին. «Վարդարի հետ 3 տարվա պայմանագիր եմ ստորագրել: Թիմի կազմում անցկացրել եմ 4 մարզում: Այնտեղ են հանդես գալիս նաև Հայաստանի ազգային հավաքականի ֆուտբոլիստներ   Արտակ Դաշյանը և Հովհաննես Համբարձումյանը,  ովքեր ինձ օգնել են ծանոթանալ թիմի հետ: Դեռևս չեմ հասցրել ծանոթանալ քաղաքին, ինչը կանեմ Մակեդոնիա վերադառնալուց հետո»:

Երվանդ ՀԱԿՈԲՅԱՆ