Դեռևս 2 տարի ինձ կտեսնեք պրոֆեսիոնալ բռնցքամարտում. Արթուր Աբրահամ

WBO վարկածով աշխարհի չեմպիոն Արթուր Աբրահամն այսօր մամուլի ասուլիս ունեցավ Հայաստանում: Մեր բռնցքամարտիկը սկզբում խոսեց իր վերջին մենամարտի մասին: 

- Այս տարի 2 մենամարտ եմ անցկացրել: Երկամյա ընդմիջումից հետո վերադարձրեցի չեմպիոնական գոտին, որն ինձ համար կյանքի նպատակ էր դարձել: Երբ գոտին խլում են ինձանից, հանգիստ քնել չեմ կարողանում (ծիծաղում է): Սեկլյոչայի հետ մենամարտը շատ դժվար էր: Նրան հաղթեցի հայկական դպրոցում ստացած խորամանկության և հատուկ մարտավարության շնորհիվ:

-Մինչ մենամարտը ունեիք աջ ձեռքի վնասվածք: Դժվա՞ր էր մենամարտել այդպես, և գիտե՞ր դրա մասին հակառակորդը:

-Իհարկե, հակառակորդը չգիտեր, քանի որ տեղյակ լինելու դեպքում կաշխատեր այդ ուղղությամբ, և ինձ համար շատ դժվար կլիներ: Մինչև մենամարտը ես մարզումներն անցկացնում էի միայն ձախ ձեռքով:

-Քանի՞ մենամարտ է սպասվում այս տարի:

-Հավանաբար, 2 մենամարտ կանցկացնեմ այս տարի: Մեկը հաստատ է` օգոստոսին, իսկ 2-րդը  հնարավոր է` դեկտեմբերին:

-Ինչպե՞ս պատահեց, որ վերջին մենամարտում Ձեզ ռինգ ուղեկցեց Vitamin-ի Գարիկը:

-Ես սիրում եմ, երբ հայերը համախմբված են լինում: Vitamin-ի տղաներին բոլորն էլ սիրում են, այդ թվում` ես:  Տեղեկացա, որ նրանք պետք է ներկա լինեն իմ մենամարտին և որոշեցի, որ Գարիկը չեմպիոնական գոտիով ուղեցկի ինձ ռինգ:

 -Ինչքա՞ն ժամանակ Ձեզ կտեսնենք մեծ սպորտում: Վերջին մենամարտից առաջ խոսվում էր կարիերան ավարտելու մասին:

-Դեռևս 2 տարի ես կլինեմ պրոֆեսիոնալ բռնցքամարտում, քանի որ ցանկանում եմ մի քիչ էլ իմ կյանքից ինչ-որ բան հասկանալ: Մարզիկի կյանքը շատ դժվար է` ամեն օր մարզումներ, ռեժիմով սնվել և այլն: Երիտասարդ տարիներն անցնում են, բայց կյանքից ոչինչ չես հասկանում:

- Հայաստանում բռնցքամարտը զարգացնելու համար ծրագրեր ունե՞ք:

-Այդպիսի ծրագրեր չունեմ, քանի որ շատ քիչ եմ լինում Հայաստանում, սակայն փորձում եմ ցանկացած հարցով օգնել:

-Ինչո՞վ եք զբաղվելու կարիերան ավարտելուց հետո: Հնարավո՞ր է մարզչական աշխատանքի անցնեք:

-Մարզչական աշխատանքի հաստատ չեմ անցնի, քանի որ շատ դժվար է: Եթե օրվա ընթացքում մարզիկն աշխատում է 10 ժամ, ապա մարզիչն աշխատում է 16 ժամ: Ես իմ ապագայի համար արդեն ստեղծել եմ ամեն ինչ:

 -Երբևէ ներկա եղե՞լ եք Դորտմունդի «Բորուսիա»-ի խաղերին: Ի՞նչ հարաբերությունների մեջ եք Հենրիխ Մխիթարյանի հետ:

-Հենրիխի հետ լավ հարաբերությունների մեջ ենք: Սակայն խաղերի ժամանակ չենք կարողանում հանդիպել, քանի որ չի ստացվում: Ամեն անգամ ինչ-որ բան խանգարում է, որ նա ներկա գտնվի իմ մենամարտերին: Ինքս ֆուտբոլ շատ եմ սիրում և երկրպագում եմ «Բորուսիա»-ին:

-Հունիսի 6-ին Հայաստանի ազգային հավաքականը ընկերական հանդիպում կանցկացնի Գերմանիայում: Հետաքրքրվո՞ւմ եք հայկական ֆուտբոլով և ներկա լինելո՞ւ եք խաղին:

-Հայկական ֆուտբոլին միշտ եմ հետևում, սակայն միայն հավաքականի խաղերին: Եթե լինեմ Գերմանիայում, ապա անպայման ներկա կգտնվեմ խաղին:

-Հնարավո՞ր է, որ կարիերան ավարտելուց հետո տեղափոխվեք Հայաստան` մշտական բնակության:

-Ես սիրում եմ Հայաստանը: Սիրում եմ քայլել Երևանի փողոցներով և զբոսնել, սակայն չեմ կարող մշտական բնակվել այստեղ, քանի որ իմ բոլոր ծրագրերը կապված են Գերմանիայի հետ: Այսքան հեռավորությունից չեմ կարող տնօրինել այդ ամենը: