Ինձ համար մեծ պատիվ է Բեռլինի լավագույն մարզիկի կոչմանն արժանանալը. Արթուր Աբրահամ

Այսօր տեղի ունեցավ գերմիջին քաշային կարգում WBO վարկածով աշխարհի չեմպիոն Արթուր Աբրահամի մամուլի ասուլիսը:

«Ուրախ եմ, որ Հայաստանում եմ: Ամեն հաղթանակից հետո ինձ հոգեկան հաղթանակ է անհրաժեշտ, որը ստանում եմ Հայաստանում»,- ասաց նա:

 - Ինչպե՞ս կմեկնաբանես քո վերջին մենամարտը:

-Մարտին Մուրայը շատ ուժեղ մրցակից էր, բայց հաղթեցի նրան: Մենամարտը ծանր էր, բայց կարևորն այն է, որ հաղթեցի, և մարզիչը գոհ է: Մուրայը մեծ փորձ ունեցող բռնցքամարտիկ է: Ես նայել եմ նրա մենամարտերը, և գրեթե միշտ հաղթել է: Ինձ հետ մենմաարտում նա 3-րդ պարտությունը կրեց իր կարիերայում:

- Ո՞վ է լինելու հաջորդ մրցակիցդ:

-Հաջորդ մրցակիցս հայտնի է: Նա մեքսիկացի է: Անունն այս պահին չեմ հիշում: Դեռ հայտնի չէ,  թե երբ կլինի, բայց, հավանաբար, տեղի կունենա մարտ ամսին: WBO-ում նա չեմպիոնի գլխավոր հավականորդն է: Պարտություն չունի:  Դեռևս չեմ տրամադրել ինձ  առաջիկա մենամարտին, քանի որ բավական ժամանակ կա:  Հակառակորդիս մարտերը դիտում եմ այն ժամանակ, երբ սկսում եմ մարզվել, իսկ հիմա ես հանգստանում եմ Հայաստանում:

-Ե՞րբ ես եկել Հայաստան և ինչքա՞ն ժամանակ ես այստեղ լինելու:

-Եկել եմ երեկ, մնալու եմ մոտավորապես 4 շաբաթ: Դեռ չեմ որոշել, թե ինչպես եմ դիմավորելու Ամանորը: Պետք է խոսեմ ընտանիքիս անդամների հետ, որպեսզի տեսնենք, թե որտեղ ենք դիմավորելու: Ես շատ կուզեի Ամանորին լինել Հայաստանում:

Խոսելով  «Բեռլինի չեմպիոն 2015» ստացած մրցանակի մասին` Աբրահամն ասաց.  «Ես 4-րդ անգամ դարձա Բեռլինի լավագույն մարզիկ: Դա ինձ համար մեծ պատիվ է: Դա ավելի շատ է ինձ ոգեշնչում, որ ավելի լավ արդյունքներ ցույց տամ»: