ԲՆ-ն լռում է, որ Սևանա լիճն ունեցել է բացասական հաշվեկշիռ. Ինգա Զարաֆյան

Չնայած պետական կառույցների ներկայացուցիչների կարծիքով՝ Սևանա լճից 70 մլն խմ հավելյալ ջրբացթողումն անհրաժեշտ է Արարատյան դաշտի ոռոգման համար և չի հանգեցնի լճի բացասական հաշվեկշռի, բնապահպանները պնդում են, որ հավելյալ ջրբացթողումն այլ նպատակ է հետապնդում և մեծ վնաս կպատճառի լճի էկոհամակարգին:

Ապրիլի 29-ին Ազգային ժողովն առաջին ընթերցմամբ ընդունել է «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքում լրացումներ կատարելու մասին» օրենքի նախագիծը, որով նախատեսվում է Սևանից 1 տարի ժամկետով հավելյալ 70 մլն խմ ջուր բաց թողնել:

Սևանա լճից հավելյալ ջրի բացթողման կողմնակիցները պնդում են, որ 70 մլն խմ հավելյալ ջուր բացթողնելն անհրաժեշտ է Արարատյան դաշտավայրը ոռոգելու համար: «Ջրասակավություն է, և Սևանից բաց թողնվող հավելյալ 70 մլն խմ ջուրը նորմատիվային պահանջ է Սևանի համար»,- ասաց ՀՀ նախագահին կից Սևանա լճի հիմնահարցերի հանձնաժողովի անդամ Ալյոշա Թարվերդյանն այսօր՝«Մեդիա կենտրոնում» տեղի ունեցած քննարկման ժամանակ:

«Արարատյան դաշտի արտեզյան ջրօգտագործումը տարիներ շարունակ սխալ է կառավարվել, և հիմա ջրի կարիք կա. գնում ենք ջրի հաջորդ աղբյուր՝ Սևան»,- խնդիրը սխալ ուղղությամբ լուծելու մասին ասաց «Բնապահպան իրավաբանների և տնտեսագետների երիտասարդական ասոցիացիա» ՀԿ նախագահ, բնապահպանական փորձագետ Էրիկ Գրիգորյանը:

«Արարատյան դաշտը ջրի կարիք ունի, բայց էնտեղ շատ վատ կառավարման խնդիր է: Սևանից բաց թողնվող ջուրն այդ խնդիրը չի լուծելու»,- ավելացրեց «Էկոլուր» տեղեկատվական ՀԿ նախագահ Զարաֆյանը: Նա հավելեց, որ չի հավատում կառավարությանը, և որ չկա հավելյալ ջուր բաց թողնելու համոզիչ պատճառաբանություն: Բնապահպանի կարծիքով՝ Սևանի մակարդակի չբարձրանալը ձեռնտու է ափերին տներ ու օբյեկտներ ունեցողներին:

«Սևան ազգային պարկ» ՊՈԱԿ-ի փոխտնօրեն Վահե Գուլանյանը ծիծաղելի համարեց այն տեսակետը, որ ջուրը կարող է բաց թողնվել «ինչ-որ օբյեկտի համար»: Գուլանյանի խոսքով՝ ափամերձ տարածքների սեփականատերերը տեղյակ են եղել ջրի մակարդակի բարձրացման հնարավոր վտանգի մասին: «Երբ որևէ ազդեցություն լինի Սևանի վրա, միանվագ կանխվելու է: Ոչ մեկ չի կարող ասել՝ ջրի մակարդակն իջնելո՞ւ է, թե՞ չէ»,- ասաց Վահե Գուլանյանը:

Ինգա Զարաֆյանը զարմացավ, թե ինչու է բնապահպանության նախարարությունը լռում այն մասին, որ 2012թ.-ին Սևանա լիճն ունեցել է 2 սմ բացասական հաշվեկշիռ:

«Նույնիսկ երբ 300 մլն խմ ջուր է բաց թողնվել, բացասական հաշվեկշիռ չի եղել»,-հակադարձեց «Սևան ազգային պարկ» ՊՈԱԿ-ի փոխտնօրեն Վահե Գուլանյանը: Սևանա լճի հիմնահարցերի հանձնաժողովի անդամ Ալյոշա Թարվերդյանը ևս պնդեց, որ բացասական հաշվեկշիռ չի լինելու Սևանում:

2008 և 2012 թթ., երբ երաշտի պատճառով կրկին որոշվեց Սևանից հավելյալ ջուր բաց թողնել, խոսակցություններ եղան նոր ջրամբարների կառուցման մասին, որտեղ ավելի մեծ ծավալի ջուր հնարավոր կլիներ պահել՝ ապահովագրելով Սևանա լիճը հավելյալ ջուր բաց թողնելու խնդրից, սակայն այդ ջրամբարներն այդպես էլ մինչ օրս չեն կառուցվել:

«Հավելյալ ջրամբարների ստեղծումը միչն այժմ ձգձգվել է: Միջազգային կազմակերպությունների աջակցությամբ էր այդ ամենն արվում: Ֆինանսական խնդիրներ կան»,- արձագանքեց Ալյոշա Թարվերդյանը:

«Սևանա լիճը չպետք է դիտարկել որպես ջրամբար, որի ջրի մակարդակը կարող ենք իջեցնել-բարձրացնել. այն բացառիկ էկոհամակարգ է, որի վրա ջրի մակարդակի յուրաքանչյուր տատանում վատ ազդեցություն է ունենում»,- հիշեցրեց Էրիկ Գրիգորյանը: