Ռուս-վրացական պատերազմը ավելի մեծ բացասական ազդեցություն է ունեցել Հայաստանի տնտեսության վրա, քան Ապրիլյան պատերազմը. Արմեն Գրիգորյան

Հայ-իրանական հարաբերությունները բարձր մակարդակի վրա են, և մենք երբևէ չենք փորձում այլ երկրների հարաբերությունների մեջ մտնել. լրագրողների հետ հանդիպման ժամանակ ասաց Անվտանգության խորհրդի քարտուղար Արմեն Գրիգորյանը՝ անդրադառնալով Իրան-ԱՄՆ հարաբերություններին և այդ շրջանակում ՀՀ-ի որդեգրած դիրքին:

Նա նշեց, որ, իհարկե, Իրան-ԱՄՆ հարաբերությունները որոշակի ազդեցություն կարող են  ունենալ ՀՀ-ի վրա, բայց արվում է առավելագույնը, որ հնարավորինս խուսափենք դրանից:

«Հայ-իրանական հարաբերություններում դրական տեղաշարժ կա: Ակտիվ քննարկում կա էներգետիկ ոլորտում համատեղ ակտիվ աշխատելու, գոյություն ունեցող պոտենցիալն օգտագործելու վերաբերյալ»,- շեշտեց Գրիգորյանը:

Անվտանգության խորհրդի քարտուղարի կարծիքով` ռուս-վրացական պատերազմը  ավելի մեծ բացասական ազդեցություն է ունեցել Հայաստանի տնտեսության վրա, քան Ապրիլյան պատերազմը, ուստի պետք է ունենալ այնպիսի համակարգ, որը հնարավորություն կտա նվազագույնի հասցնելու նման ազդեցությունը: 

«Վրաստանի հետ հարաբերություններում արդեն բավականին դրական տեղաշարժ կա։ Ակտիվ աշխատում ենք բոլոր ուղղություններով՝ հասկանալու համար, թե տնտեսական և ծրագրային ո՞ր  ուղղությամբ կկարողանանք Վրաստանի հետ աշխատել»,- ասաց նա:

Գրիգորյանը պնդեց, որ փորձելու են ճեղքել ՀՀ-ի շրջափակումը, և այդ գործում կարևոր ազդեցություն է ունենալու Հյուսիս-հարավ ճանապարհը: Բացի այս` պետք է զարգացնել low-cost ավիացիան, որը կհեշտացնի շրջափակման ճեղքումը: