ՀՀԿ խմբակցության նորընտիր ղեկավարի հույսը մյուս խմբակցությունների ողջամտությունն է

Նոր քաղաքական իրավիճակում, երբ ՀՀԿ-ն այլևս չունի կոալիցիոն գործընկեր, ստիպված է քվեարկությունների ժամանակ ապահովել բոլոր ՀՀԿ-ական պատգամավորների ներկայությունը:

Լրագրողներն այսօր ԱԺ-ում ՀՀԿ խմբակցության նորընտիր ղեկավար Վահրամ Բաղդասարյանից հետաքրքրվեցին, թե իրեն կհաջողվի՞ ապահովել ՀՀԿ-ականների ներկայությունն ու համախմբվածությունը: «Ինձ թվում է՝ հնարավոր է լինեն բացակայություններ, բայց մյուս խմբակցություններն էլ ողջամիտ կմոտենան և չեն փորձի տապալել ԱԺ աշխատանքները: Պարզապես, երբ վիճելի օրենքներ լինեն, պետք է համագործակցված աշխատենք այլ խմբակցությունների հետ»,- ասաց նա:

Հավանաբար, Վահրամ Բաղդասարյանը չընկալեց հարցադրումը, ուստի լրագրողները ևս մեկ անգամ հարցրեցին` կհաջողվի՞ իրեն զգաստացնել բոլոր պատգամավորներին, անգամ` բարդ բնավորություն ունեցող ՀՀԿ-ականներին, Վահրամ Բաղդասարյանը պատասխանեց. «Պետք է փորձենք: Բոլոր պատգամավորներն էլ հասուն, կայացած քաղաքական գործիչներ են, և բոլորն էլ ըմբռնումով են մոտենում իրենց աշխատանքներին»: