Ի՞նչ է անում ԱԱԾ-ն քրեական հեղինակության եղբոր սպանության գործով

Երեկ Կենտրոն և Նորք-Մարաշ վարչական շրջանների ընդհանուր իրավասության դատարանում` դատավոր Մնացական Մարտիրոսյանի նախագահությամբ, քննվել է քրեական հեղինակություն` Կայարանցի Թևոսիկի եղբոր` Արթուր Սաֆարյանի սպանության գործով որպես մեղադրյալ ներգրավված Տիգրան Ասատրյանի պաշտպան Վարդուհի Էլբակյանի միջնորդությունը: Պաշտպանը միջնորդել էր 500 հազար դրամ գրավի դիմաց փոխել իր պաշպանյալի խափանման միջոց կալանավորումը, սակայն դատարանը մերժել էր այն:

Yerkir.am-ի հետ զրույցում պաշտպանը նշեց, որ իրենք պատրաստ էին ավելին վճարել, եթե, իհարկե, դատարանը պահանջեր: Հիշեցնենք, որ Տիգրան Ասատրյանին մեղադրանք է առաջադրվել ՀՀ քրեական օրենսգրքի 235 հոդվածի 1-ին մասով (ապօրինի կերպով հրազեն և ռազմամթերք ձեռք բերել, պահել և կրել) և 335 հոդվածի 1-ին մասով (հաստատապես հայտնի նախապատրաստվող ծանր կամ առանձնապես ծանր հանցագործության մասին չհայտնելը):

Սաֆարյանի սպանության գործը ՀՀ ոստիկանությունից տեղափոխվել է ՀՀ ազգային անվտանգության ծառայության քննչական վարչություն: Գործի քննությունը հանձնարարվել է ԱԱԾ քննչական վարչության պետի տեղակալ, քննիչ Միքայել Համբարձումյանին:

Թեև Տիգրան Սարգսյանի վերաբերյալ դեռևս քննչական գործողություն, որպես այդպիսին, չի կատարվել, սակայն Էլբակյանը կարծում է, որ ԱԱԾ-ն ձեռքերը ծալած չի նստի: Հարցին, թե ճի՞շտ էր, արդյոք, գործը ԱԱԾ տեղափոխելը, Էլբակյանը պատասխանեց, որ այդ մասին կհայտնի, երբ արդյունքներ լինեն: