Բռնցքամարտ. Անուշ Գրիգորյանը նվաճեց աշխարհի չեմպիոնի տիտղոսը

Ապրիլի 24-ին՝ Հայոց ցեղասպանության 99-րդ տարելիցի օրը, Բուլղարիայի մայրաքաղաք Սոֆիայում ծածանվեց նաև հայոց եռագույնը: Բռնցքամարտի երիտասարդների աշխարհի առաջնությունում բռնցքամարտի Հայաստանի հավաքական թիմի  գեղեցիկ սեռի միակ ներկայացուցիչը՝ Անուշ Գրիգորյանը, չուներ հավասարը և հռչակվեց աշխարհի չեմպիոն: Եզրափակիչ մենամարտում Անուշի մրցակիցը իտալուհի Իրմա Տեստան էր, ով բավականին բարձրահասակ էր և ավելի քան 20 սանտիմետրով գերազանցում էր հայ մարզուհուն: Այնուհանդերձ, մեր բռնցքամարտիկը ճիշտ մարտավարության շնորհիվ զրոյացրեց մրցակցի ֆիզիկական առավելությունը և դարձավ բռնցքամարտի առաջին հայ աշխարհի չեմպիոնուհին:

Տեղեկացնենք, որ աշխարհի առաջնությունում մեդալ էր նվաճել նաև Նարեկ Մանասյանը: 81 կգ քաշային մեր բռնցքամարտիկը արժանացել էր բրոնզե մեդալի:

Հայաստանի հավաքականը Բուլղարիայից Հայաստան կժամանի ապրիլի 25-ի լույս 26-ի գիշերը` Երևանի ժամանակով 01:30-ին: