Թուրք պատգամավորը հայց է ներկայացրել Էրդողանի և Դավութօղլուի դեմ՝ Սիրիայում ցեղասպանություն կազմակերպելու մեղադրանքով

Ըստ Cumhuriyet-ի՝ Թուրքիայի ընդդիմադիր Ժողովրդա-հանրապետական կուսակցության պատգամավոր Հուսեյն Այգյունը Թունջելիի դատախազությունում դատական հայց է ներկայացրել վարչապետ Ռեջեփ Թայիփ Էրդողանի, ԱԳ նախարար Ահմեդ Դավութօղլուի և Ազգային հետախուզության ծառայության պետ Հաքան Ֆիդանի դեմ՝ մարդկության դեմ ցեղասպանություն իրագործելու և այդ նպատակով հանցախումբ ստեղծելու մեղադրանքով:

«Ինչ ցավալի է, որ Սիրիայում 100 հազար անմեղ մարդկանց մահվան և ներքին արյունոտ պատերազմի ամենամեծ աջակիցներից մեկը հենց մեր կառավարությունն է` գլխավորությամբ վարչապետ Ռեջեփ Թայիփ Էրդողանի։ Սիրիայում ահաբեկչական խմբավորումները ներքին պատերազմի ժամանակ մեծ թվով արյունալի գործողություններ են կատարել, որոնցից մեկն էլ 2013-ի ամռանը զարին գազով իրականացված հարձակումն էր»,- ասել է թուրք պատգամավորը։

Ըստ տեղեկությունների՝ զարին գազով հարձակումն իրականացվել է Ռեջեփ Թայիփ Էրդողանի իմացությամբ, իսկ զարինը ահաբեկիչներին մատակարարել են  Թուրքիայի ազգային հետախուզությունն ու ժանդարմերիան։

Հայցում նշվել է նաև, որ ահաբեկչական խմբավորումները կոտորել են նաև մեծ թվով ալևիների, և նրանց հիմնական թիրախը եղել են ալևիների գյուղերը: Ըստ Թուրքիայի քրեական օրենսգրքի՝ ահաբեկիչները 5237 հոդվածի 76-րդ՝ «ցեղասպանություն» և 77-րդ կետով՝ «մարդկության դեմ հանցանք» են փաստացի իրականացրել: