Տեղի ունեցավ սեղանի թենիսի ուսանողական մրցաշարը

Ապրիլի 8-9-ը Հայաստանի ուսանողական 15-րդ մարզական խաղերի շրջանակներում կայացել է սեղանի թենիսի մրցաշարը, որին մասնակցել է տղաների` 12 և աղջիկների 8 թիմ՝ ՀՀ տարբեր բուհերից։ Ընդհանուր առմամբ, ուժերը չափել է շուրջ 80 ուսանող՝ ինչպես պրոֆեսիոնալ, այնպես էլ՝ սիրողական։

Տղամարդկանց թիմային հաշվարկում առաջինը ֆիզիկական կուլտուրայի հայկական պետական ինստիտուտն էր, երկրորդ հորիզոնականում՝ Վանաձորի մանկավարժականը, երրորդում՝ Հայաստանի պետական ճարտարագիտական համալսարանը։

Աղջիկների պայքարում լավագույնն է ճանաչվել կրկին ֆիզիկական կուլտուրայի հայկական պետական ինստիտուտը ներկայացնող թիմը, երկրորդ տեղում է Հայ-ռուսական (Սլավոնական) համալսարանը, իսկ երրորդ մրցանակային տեղում Երևանի պետական համալսարանն է։

Տղամարդկանց անհատական առաջնությունում առաջին տեղում է Համլետ Հայրապետյանը (ՖԿՀՊԻ), երկրորդում՝ Գևորգ Աբրահամյանը (ՖԿՀՊԻ), երրորդում՝ Էդիկ Կոստանյանը (ՎՊՄԻ):

Աղջիկների մրցաշարում լավագույն թենիսիստուհի ճանաչվեց Հասմիկ Խաչատրյանը (ՖԿՀՊԻ), այնուհետև՝ Ռուբինա Վարդանյանը (ՖԿՀՊԻ) և Թամարա Աղայանը (Հայ-ռուսական (Սլավոնական) համալսարան):

ՖԿՀՊԻ աղջիկների հավաքականն այս տարի մասնակցություն կունենա Եվրոպական համալսարանական մարզական խաղերին։

Հայաստանի ուսանողական 15-րդ մարզական խաղերի սեղանի թենիսի մրցաշարի գլխավոր մրցավարն էր ՀՀ սեղանի թենիսի ֆեդերացիայի նորընտիր նախագահ, Եվրոպայի և ԽՍՀՄ չեմպիոն, ՀՀ վաստակավոր մարզիչ Ֆելիքս Սարգսյանը։ Մրցաշարի ընթացքում նա նկատեց, որ շատ կարևոր է ուշադրության կենտրոնում պահել դպրոցական և համալսարանական սպորտը, քանի որ դրանք տարբեր մարզաձևերի և ընդհանրապես, մեծ սպորտի զարգացման կարևոր պայմաններից են:

Հիշեցնենք, որ Հայաստանի ուսանողական 15-րդ մարզական խաղերի բացման պաշտոնական արարողությունը տեղի կունենա ապրիլի 14-ին՝ ժամը 14.00-ին, Խուլ ու համրերի կենտրոնի մարզադահլիճում։ Հայաստանի ուսանողական մարզական խաղերը կազմակերպում են ՀՀ կրթության և գիտության նախարարությունը, Հայաստանի ուսանողական մարզական ֆեդերացիան և Հայաստանի երիտասարդական հիմնադրամը։ Հիմնադրամի առաջարկությամբ այս տարվա բոլոր հաղթող ուսանող մարզիկները, որպես պարգև, 3-օրյա հանգիստ կանցկացնեն Ծաղկաձորում, որտեղ նաև տեղի կունենա լավագույն ուսանող մարզիկների ամենամյա մրցանակաբաշխությունը: