Արևմուտքը թույլ չի տվել ՄԱԿ ԱԽ-ին դատապարտել Քեսաբում գրոհայինների գործողությունները. ՄԱԿ-ում ՌԴ ներկայացուցչություն

ՄԱԿ-ի Անվտանգության խորհրդի արևմտյան երկրները թույլ չեն տվել Ռուսաստանին դատապարտելով արձագանքել Քեսաբում սիրիացի գրոհայինների գործողություններին և Լաթաքիա նավահանգստի գնդակոծություններին, որոնց պատճառով դադարեցվել է քիմիական զենքի արտահանումը. հայտնում է  ИТАР-ТАСС-ը:  Այդ մասին գործակալությանը հայտնել է ՄԱԿ-ում ՌԴ մշտական ներկայացուցչությունը։

«Ռուսաստանի առաջարկները Քեսաբում  և Լաթաքիայում  իրավիճակի վերաբերյալ աջակցություն չեն ստացել ԱԽ-ում  արևմտյան գործընկերների կողմից»,- հայտնել են մշտական ներկայացուցչությունից:

ՌԴ-ի նախագծում դատապարտվում են սիրիահայերով բնակեցված Քեսաբ ավանի գրոհները սիրիական ընդդիմադիր խմբավորումների կողմից, որոնց թվում են «Ալ Քաիդա»-ի հետ կապված խմբավորումները:

Երեկ  ՄԱԿ-ում ՌԴ մշտական ներկայացուցիչ Վիտալի Չուրկինը հույս էր հայտնել, որ իրենց նախագիծը, որն Անվտանգության խորհրդի պաշտոնական փաստաթուղթ չի համարվում, կհաջողվի համաձայնեցնել: Նա հայտարարել էր, որ Քեսաբում գործողություններն անպայման կքննարկվեն Անվտանգության խորհրդի` Սիրիայում հումանիտար իրավիճակի վերաբերյալ հանդիպման ժամանակ, որը նշանակված է ապրիլի 30-ին: