Սկանդալային գաղտնալսում. Թուրքիան Սիրիայի տարածքից 8 հրթիռ կարձակի դեպի Թուրքիա, որը Սիրիայի դեմ պատերազմ սկսելու պատճառ կհանդիսանա

Համացանցում տարածվել է Թուրքիայի ԱԳ նախարարի, փոխնախարարի, Ազգային հետախուզության ծառայության պետի եւ ԶՈՒ գլխավոր շտաբի պետի տեղակալի` Սիրիայի վերաբերյալ զրույցի ձայնագրությունը:

Ըստ Milliyet-ի՝ ձայնագրության մեջ Դավութօղլուն խոսում է Սիրիայում թուրքական հող համարվող` Սուլեյման Շահի դամբարանի մասին: Ազգային հետախուզության ծառայության պետ Հաքան Ֆիդանը պնդում է, որ ինքը նույնիսկ 4 մարդ կարող է ուղարկել Սիրիա, որոնք այնտեղից 8 հրթիռ կարձակեն Թուրքիայի տարածքի ուղղությամբ, ինչը պատճառ կհանդիսանա Սիրիայի դեմ պատերազմ սկսելու համար:

Նույն ձայնագրության մեջ Դավութօղլուն ափսոսում է այն բանի համար, որ 2012-ին չեն հարձակվել Սիրիայի վրա:

Այս ձայնագրության` համացանցում հայտվելուց հետո Դավութօղլուն հանդես է եկել հայտարարությամբ: «Այս ձայնագրությունները Թուրքիայի և թուրք ժողովրդի դեմ պատերազմի հայտարարություն են: Ոչ ոք իրավունք չունի խախտելու Թուրքիայի խաղաղությունը»,- ասել է նա: