«Նաիրիտ»-ի աշխատակիցների աշխատավարձերը վճարվել են «Որոտան» ՀԷԿ-ի միջոցով. Վահագն Խաչատրյան

Ցանկացած պետական ունեցվածք կարելի է վաճառել, քանի որ միշտ չէ, որ պետությունը կարողանում է կառավարել իր սեփականությունը: Այս կարծիքին է ՀԱԿ անդամ, տնտեսագետ Վահագն Խաչատրյանը: Սակայն, ըստ նրա, «Որոտան» ՀԷԿ-ի գործարքը իր նշած տարբերակի մեջ չի մտնում:

«Նման ունիկալ կառույցը վաճառել` նշանակում է պարզապես տնտեսապես մի մեծ, «համեղ պատառ» ուրիշին տալ, որի համար պետք է շատ ավելի մեծ գին վճարվեր»,- լրագրողների հետ հանդիպման ժամանակ ասաց նա և հավելեց, որ այդ կառույցն անիմաստ էր վաճառել, քանի որ տնտեսական առումով «Որոտանը» բավականին հաջող գործունեություն է ծավալել:

«Որոտան»-ի միջոցով վճարվել են նաև «Նաիրիտ»-ի աշխատակիցների աշխատավարձերը»,- հայտարարեց նա:

Խաչատրյանի խոսքով` «Որոտան» ՀԷԿ-ի գործարքի օրինականության հետ կապված, արդարադատության նախարարի պատասխանը շատ մանկամիտ էր: Ըստ նրա` նախարարը փորձում էր ոչ օրինական գործարքի բացատրությունը տալ, ինչը հնարավոր չէ, քանի որ գործարքում իրավական առումով հարցականները շատ են: «Վաճառքի պայմանագիրը նայում ես` առաջին հարցը ծագում է, թե որտե՞ղ է այդ 180 մլն դոլարը: Պայմանագրի համաձայն` գումարը մաս-մաս պետք է փոխանցվի, սակայն չի նշված կոնկրետ ում` կառավարությա՞նը, էներգետիկայի նախարարությա՞նը, թե՞ ՓԲԸ-ին»,- ասաց նա և նշեց, որ այս հարցերի պատասխանը ոչ ոք չի տալիս:

Ըստ Խաչատրյանի` ակնհայտ է, որ վաճառքից ստացված գումարը պետք է մտնի պետական բյուջե, սակայն արդեն մեկ ամիս է` այդ գործարքից բյուջե գումար չի փոխանցվել: «Եթե պարզվի, որ գումար չի մտել բյուջե, դրանով պետք է զբաղվեն իրավապահ մարմինները»,- հայտարարեց նա:

Գործարքի իրավական բացերի մասին yerkir.am-ի տեսանյութում պատմում է տնտեսագետը: