Կա՛մ չեն վճարվել, կա՛մ վճարվել են մասամբ․ «Փաստ»

«Փաստ» օրաթերթը գրում է․ «Դեռևս ամիսներ առաջ մասնագետները խոսում էին այն մասին, որ հետպատերազմյան ցնցումներն առաջինը նկատելի են լինելու տնտեսության վրա, ինչն էլ իր հերթին շղթայական ռեակցիայով ուղղակի ազդեցություն է ունենալու պետբյուջեի վրա։ Ավելին, որոշ տնտեսագետներ կարծիք էին հայտնում, որ շուտով հնարավոր չի լինելու թոշակ, նպաստ ու աշխատավարձ վճարել: Ճիշտ է, վերջերս այդ նպատակով իշխանությունները երկիրը գցեցին հերթական պարտքի տակ՝ 750 մլն դոլարի եվրոբոնդ թողարկելով, սակայն, կարծես, դա էլ չի օգնում: «Փաստ» թերթի տեղեկություններով, ինչքան էլ իշխանությունները և անձամբ Նիկոլ Փաշինյանը փորձում են այնպես անել, որ ֆինանսական առումով խուճապ չառաջանա հանրության շրջանում, այնուամենայնիվ, մարդիկ իրենց վրա են զգում, թե ինչ անկառավարելի վիճակ է ստեղծվել երկրում և ողջ կառավարման համակարգում։

Մասնավորաբար, մեր տեղեկություններով, պետբյուջեում առաջացած շատ լուրջ ճեղքվածքների պատճառով լուրջ խնդիրներ են առաջացել որոշ վճարումների հետ կապված: Խոսքը հատկապես միանվագ վճարումների մասին է: Ի մասնավորի, մենք դժգոհություններ ենք ստանում, որ պետության կողմից հղի կանանց տրվող նախածննդյան գումարները չեն հատկացվում: Ֆինանսական խնդիրներ կան նաև երեխայի ծննդյան միանվագ գումարների հետ կապված: Ըստ մեր ունեցած տեղեկությունների, առանձին դեպքերում 2-3 ամիս է՝ այդ գումարները կա՛մ չեն վճարվել, կա՛մ վճարվել են մասամբ»։

Մանրամասները՝ «Փաստ» օրաթերթի այսօրվա համարում