Ուղևորափոխադրումների կազմակերպման լիցենզիան վերացվում է

ԱԺ այսօրվա նիստում քննարկվում է «Ավտոմոբիլային տրանսպորտի մասին» ՀՀ օրենքում փոփոխություններ և լրացումներ կատարելու մասին որոշումը:

Կանոնավոր ուղևորափոխադրումների կազմակերպման մրցույթի կարգը ամբողջովին ենթարկվել է փոփոխությունների: Այդ կապակցությամբ ավելացվել է նոր հասկացություն՝ օպերատոր, որը Երևանում ընդհանուր օգտագործման ներքաղաքային կանոնավոր փոխադրումներ իրականացնող` 100 տոկոս համայնքային մասնակցությամբ կազմակերպություն է:

Նախատեսվում է նաև, որ երթուղու սպասարկումն իրականացվելու է մրցույթում հաղթող կազմակերպության կողմից մրցույթով առաջարկված փոխադրավարձով, բացառությամբ Երևան քաղաքում, որտեղ երթուղիների սպասարկումն իրականացվում է Երևանի ավագանու կողմից սահմանված փոխադրավարձով: Երթուղու փոխադրավարձը կարող է վերանայվել օբյեկտիվ պատճառներով, իսկ Երևան քաղաքում՝ մրցութային հանձնաժողովի ներկայացմամբ և Երևանի ավագանու որոշմամբ:

Ուղևորափոխադրումների կազմակերպման լիցենզիան վերացվում է: Մրցույթով կազմակերպությունների ընտրությունը բավարար է, իսկ լիցենզավորումը կրելու է ձևական բնույթ: