Այսուհետ տնտեսվարողների կողմից փաստաթղթերը կնքված ներկայացնելու պահանջը վերացվում է

Այսօր կառավաության նիստում էկոնոմիկայի նախարար Արծվիկ Մինասյանը ներկայացրեց կառավարության որոշման մեջ փոփոխություն կատարելու մասին հարց, որի ընդունումը պայմանավորված է ընկերությունների գրանցման ընթացակարգերի պարզեցման, ժամկետների և ծախսերի կրճատման, ինչպես նաև գործարարությամբ զբաղվելու դյուրացման անհրաժեշտությամբ:

Նախկինում ընդունված որոշումներով վերացվել էր տնտեսվարողների կողմից ներկայացվող փաստաթղթերի կնքված լինելու պահանջը, սակայն ներկայումս կան իրավական ակտեր, որոնցում դեռևս ամրագրված է նման պահանջ, ինչպես նաև ընկերություններից կնիք պահանջվում է բանկերի կողմից: Բացի այդ` գործնականում ձևավորվել է սովորույթ, որի համաձայն` իրավաբանական անձ ստեղծելիս կազմակերպության ղեկավարը ձեռք է բերում կնիք: Այդ երևույթն ավելորդ դժվարություն է ստեղծում իրավաբանական անձի հենց կազմավորման փուլում այն տեսանկյունից, որ իրավաբանական անձի կողմից կնիքի ձեռք բերումը դանդաղեցնում է իրավաբանական անձի գրանցման գործընթացը, նաև դրա օգտագործումը, ինչպես ցույց է տվել փորձը, որևէ հավելյալ երաշխիք չի ստեղծում` փաստաթղթերի կեղծման տեսանկյունից:

Քանի որ ՀՀ կառավարությունը որդեգրել է Հայաստանում ձեռնարկատիրությամբ զբաղվելու համար բարենպաստ պայմաններ ապահովելու քաղաքականություն, ուստի նախագծով առաջարկվում է ուժը կորցրած ճանաչել իրավական ակտերում տնտեսավարողների կողմից փաստաթղթերը կնքված ներկայացնելու պահանջի վերաբերյալ դեռևս առկա դրույթները:

Նախագծի ընդունման դեպքում ակնկալվում է ապահովել գործարար միջավայրի բարելավման շարունակականությունը` պարզեցնելով ձեռնարկատիրությամբ զբաղվելու գործընթացը: Կնիքի պահանջն ուժը կորցրած ճանաչելու դեպքում ընկերություններն այլևս ստիպված չեն լինի վճարել վերջինս պատվիրելու համար գանձվող 15.500 դրամը, ինչպես նաև կկրճատվի ավելորդ վարչարարությունը:

Որոշումն ընդունվեց: