Նոր պատվաստում մինչև 1 տարեկան երեխաների համար

Մինչև մեկ տարեկան երեխաները 2014 թվականի սեպտեմբերից պատվաստվելու են նաև պնևմակոկային հիվանդությունների դեմ: Առաջին պատվաստումը կատարվելու է 1.5 ամսականում, այնուհետև 3 և 4.5 ամսականներում: Պատվաստանյութն արտադրված է Բելգիայում: Այս մասին լրագրողների հետ հանդիպման ժամանակ ասաց առողջապահության նախարարության իմունականխարգելման ազգային ծրագրի ղեկավար Գայանե Սահակյանը:

Նա հայտնեց նաև, որ պատվաստանյութը գրեթե հակացուցումներ չունի, և եթե երեխան առողջ է, ապա կարող է պատվաստվել: Հետպատվաստումային ռեակցիաները կլինեն այնպիսին, ինչպիսին մյուս պատվաստումների դեպքում են: Իսկ, ընդհանուր առմամբ, ըստ բանախոսի, հետպատվաստումային ռեակցիաները կախված են մարդու օրգանիզմի յուրահատկությունից, ինչպես նաև, թե նա այդ պահին ինչ միջավայրում, վիճակում է գտնվում:

«Աշխարհում չկա և ոչ մի հետազոտություն, թե դեղորայքի որ բաղադրիչն օրգանիզմի համար ալերգիկ կլինի, որը` ոչ: Ամեն դեպքում` հիվանդության ռիսկը պատվաստման ռիսկի հետ չես կարող համեմատել»,- ասաց Գ. Սահակյանը եւ հավելեց, որ մինչ այժմ արված հետազոտությունները ցույց են տալիս, որ հետապատվաստումային ռեակցիաների 10-12 դեպք է գրանցվում մեկ տարվա կտրվածքով:

Նա նշեց նաև, որ մարդու քիթ-ըմպանում մշտապես եղող պնևամակոկերն ակտիվանում են զանազան վարակներից հետո և կարող են մի շարք հիվանդությունների պատճառ դառնալ, օրինակ` թոքաբորբի, մենինգիտի: