Նրանք արդեն մեր ցույցերի հանդեպ իմունիտետ են ձեռք բերել. խաբված գնորդները եկել էին հանդիպելու նախագահի հետ

Այսօր առավոտյան «Տոնուս» շինարարական ընկերության կողմից խաբված քաղաքացիները հավաքվել էին ՀՀ նախագահի առանձնատան առջեւ` նախագահի հետ հանդիպելու ակնկալիքով: Նրանց դիմավորեց  ՀՀ նախագահի վերահսկողական ծառայության ղեկավար Հովհաննես Հովսեփյանը եւ խոստացավ բողոքները լսել նախագահի նստավայրում:

Yerkir.am-ի հետ զրույցում բողոքող բնակիչներից տիկին Զոյան ասաց, որ Հովսեփյանն իրենց հայտնել է, որ գործին մեկ ամիս հետո ընթացք կտրվի: Սակայն բնակիչներին չէր գոհացրել նախագահականից ստացված պատասխանը: «Հոգնել ենք արդեն, զզվել ենք: Ինչքա՞ն կարելի է անընդհատ հույս տալ, սպասեցնել»,- դժգոհեցին նրանք:

Անդրադառնալով «Արցախբանկի» ղեկավարության հետ հանդիպումներին, տիկին Զոյան նշեց, որ դա ընդամենը գեղեցիկ կազմակերպված շոու է, որն արդյունք չի տալիս: Նշենք, որ հիշյալ բանկում են գրավադրված նրանց բնակարանները:

«Իրենք արդեն մեր ցույցերի հանդեպ իմունիտետ են ձեռք բերել»,- նշեց բնակիչներից մեկը:

Մանրամասները` yerkir.am-ի տեսանյութում: