Երբ գովազդվում է անգամ արտագաղթը

ԱԺ նիստում, երբ քննարկվում էր «Գովազդի մասին» ՀՀ օրենքում փոփոխություններ և լրացումներ կատարելու մասին օրենսդրական նախաձեռնությունը, որը նախատեսում է թունդ ալկոհոլային խմիչքների գովազդի թույլտվություն հեռուստաեթերում`ժամը 22:00-ից մինչև 06:00-ն, ԱԺ ՀԱԿ խմբակցության պատգամավոր Արամ Մանուկյանը նշեց, որ օրենքը հանրության շահին խիստ դեմ է:

Նա նշեց, որ շատ սխալ է, երբ հեռոստաընկերությունները գովազդի պահին բարձրացնում են գովազդի ձայնը, դա վնաս է առողջությանը, սթրես է առաջացնում մարդու մոտ: «Գովազդների մեծ մասն ավելի շատ հակագովազդ է, դա չի կարելի ցույց տալ երեխաներին: Օրինակ՝ երեք րոպեում հինգ անգամ նույն ապրանքը գովազդելը հակացուցված է»,- ասաց պատգամավորը՝ շեշտելով մեծ թվով անբարեխիղճ գովազդների առկայությունը, առավել եւս, որ դրանցում իշխում է անգրագիտությունը: Պատգամավորի խոսքով՝ գովազդում հնչում են «կանացի վարսավիրանոց», «տղամարդու կաշվից կոշիկ» արտահայտությունները:

Ըստ նրա` գովազդվում է անգամ արտագաղթը և մարդկանց արտահանումը, երբ նկարագրվում է Ռուսաստան էժան գներով մեկնող միկրոավտոբուսների հարմարավետությունը: Արամ Մանուկյանը նաեւ հայտարարեց, որ գովազդը մենաշնորհված է Սերժ Սարգսյանի փեսա Միքայել Մինասյանի կողմից: