Փոխարժեքներ
27 10 2024
|
||
---|---|---|
USD | ⚊ | $ 387.25 |
EUR | ⚊ | € 419.2 |
RUB | ⚊ | ₽ 4.01 |
GBP | ⚊ | £ 502.92 |
GEL | ⚊ | ₾ 141.79 |
Իշխող Հանրապետական կուսակցությունն այս երկրում ամեն ինչ յուրացնելուց հետո, երբ պաշտոնական բոլոր գլխավոր աթոռներից մինչև հեռավոր գյուղապետարանների իշոտնուկներ այլևս ու բացառապես իրեն են պատկանում, հիմա էլ անցել է տոներն ու տոնական օրերն իրենով անելու սուրբ գործին:
Կանանց միջազգային օրը վաղուց դրանց շարքում է, որն էլ Հանրապետականի նազենիները կամաց-կամաց յուրացնում են: Ահավասիկ, Նկարիչների միությունում (որն, ըստ ՀԿ-ների մասին օրենքի, պիտի որ ապաքաղաքական կառույց լիներ, հետևաբար` չէր կարող ծառայեցվել որևէ կուսակցության շահի ու շահախնդրության) մարտի 8-ին կազմակերպվել է նկարչուհիների աշխատանքների ցուցահանդես` ՀՀԿ հովանու ներքո. ցուցահանդեսի մասին իրազեկող պաստառի վրա եղել է ՀՀԿ տարբերանշանը, «Հանրապետական կուսակցության կանանց խորհուրդ» մակագրությունը, իսկ Նկարիչների միության շենքում` ՀՀԿ-ի դրոշներ: Ցուցահանդեսն իրենց ներկայությամբ պատվել են ՀՀԿ-ի կենդանի դասականներ` մշակույթի նախարարը, Երևանի քաղաքապետը և ԱԺ տիկին փոխնախագահը: Ցուցահանդեսի մասնակից նկարչուհիները տոնի առթիվ, բացի ծաղիկներից, նաև նվերներ են ստացել` թեյնիկներ (սկզբում, Մաքսային միություն մտնելու «շրջանակներում», նախատեսված է եղել ինքնաեռ` սամովար), որոնք անտարակույս խորհրդանշել են ընտանեկան ջերմությունն ու ապահովությունը` «էս ժողովուրդը դեռ չայ խմելու հնար ու բախտավորություն ունի` էլ ինչ է ուզում» ենթատեքստով: (Չփարատվող կասկածներ կան, որ թեյնիկի գաղափարը Գալուստ Սահակյանը հղացած կարող էր լինել, յա թե չէ Կարեն Ավագյանը, մանավանդ որ վերջինս, ասում են, փուչիկի գործից հետո միայն պինդ բաների է հավատում):
Բայց ինչպես վերջին ժամանակներս հաճախ է պատահում այդ կուսակցության հետ, ցուցահանդեսի բացմանը մի «խիար» էլի թարս է բուսնել` նկարչուհի Մարիամ Մուղդուսյանը, իմանալով, որ միջոցառումն անցկացվում է ՀՀԿ բարձրաբերձ հովանու ներքո, երեւի ՀՀԿ-ին հակառակ, չի հրաժարվել մասնակցությունից, բայցեւ, ՀՀԿ դասականների ապշահար հայացքների ներքո, հրաժարվել է թեյնիկից:
Դեպքը, ըստ ականատեսների, ծանր է ազդել դասականների վրա, մանավանդ` հեռակա կարգով` Կ. Ավագյանի վրա, որը հիմա արդեն պինդ բաների էլ չի հավատում:
Բ. Գասպարյան