Պետք է ձևավորվի այնպիսի կառավարություն, որը երկրին չվերաբերվի որպես ժամանակավոր կացարանի

Մենք պետք է ունենայինք այնպիսի տնտեսություն, որը հնարավորություն կտար հատկապես ռազմավարական նշանակության ոլորտների օտարումը բացառել. Yerkir.am-ի հետ զրույցում ասաց ԱԺ ԲՀԿ խմբակցության պատգամավոր, ԲՀԿ մամուլի քարտուղար Տիգրան Ուրիխանյանը` խոսելով կառավարության կողմից ամերիկյան մի ընկերության Որոտանի կասկադի վաճառքի մասին:

Նրա խոսքով` արդյունավետ տնտեսության հիմքը ռազմավարական նշանակության օբյեկտների պահպանումն է, որոնք կառավարությունը պետք է վերցներ իր կարգավորիչ ազդեցության տակ, և ցանկացած առ ու վաճառք այս համատեքստում երկրի համար նպաստավոր չէ:

«Այլ հարց է, թե ստեղծված իրավիճակում այլընտրանքային լուծումներ կառավարությունը ունե՞ր, թե՞ ոչ: Դա անգամ հռետորական հարց է, որովհետև շատ բան կարելի էր անել այս տարիների ընթացքում, բայց չի արվել, առավել ևս, որ շատ բան կարելի էր չանել»,- ասաց Տիգրան Ուրիխանյանը:

Նա նաև կարծիք հայտնեց, որ Որոտանի կասկադի վաճառքը հերթական անգամ վկայում է ստեղծված անբարենպաստ վիճակի մասին, որն անարդյունավետ կառավարման արդյունք է: Ըստ Տիգրան Ուրիխանյանի` Հայաստանում պետք է ձևավորվի այնպիսի կառավարություն, որը երկիրը համարի մշտական բնակության վայր, այլ ոչ թե ժամանակավոր կացարան: