ԻՊ-ը պետք է ոչնչացվի, Սիրիայում ձեւավորվի ժամանակավոր կառավարություն. միջազգային բանակցությունների արդյունքում հռչակագիր է ընդունվել

Վիեննայում ավարտվել է Սիրիայի հարցով  միջազգային բանակցությունը, որին մասնակցում էին 19 երկրի, այդ թվում` Ռուսաստանի, ԱՄՆ-ի, Սաուդյան Արաբիայի, Թուրքիայի, Իրանի, ԱՄԷ-ի, Քաթարի, Հորդանանի, Գերմանիայի, Ֆրանսիայի, Եգիպտոսի, Իտալիայի, Մեծ Բրիտանիայի, Իրաքի եւ Լիբանանի արտգործնախարարները:  Բանակցությունները տեւել են 7 ժամ: Արդյունքում ընդունված փաստաթուղթը, որ հրապարակել է Սիրիայի հարցով ՄԱԿ-ի հատուկ բանագնաց Ստաֆան դի Միստուրան,  ներառում է 9 կետ`

• Սիրիայի ողջ տարածքում պետք է ապահովվի հումանիտար օգնության տրամադրումը,
• Իսլամական պետությունը եւ ՄԱԿ-ի կողմից ահաբեկչական հռչակված մյուս խմբավորումները պետք  ոչնչացվեն,
• Սիրիան կպահպանվի  ամբողջական`  աշխարհիկ պետություն,
• կոնֆլիկտի լուծման դիվանագիտական քայլերն ավելի կակտիվացվեն,
• կկազմակերպվի  միջազգային մակարդակի հանդիպում ընդդիմության եւ Բաշար Ասադի  կառավարության միջեւ, որի արդյունքում պետք է ձեւավորվի  անցումային կառավարություն, որ կներկայացնի ողջ ժողովրդի շահերը, եւ որը կկառավարի մինչեւ հաջորդ ընտրություններն ու նոր սահմանդրության ընդունումը,
• Սիրիայի ժողովուրդը պետք է կանխորոշի իր ճակատագիրը,
• միջազգային բանակցությունների մասնակից երկրները  ջանքեր կգործադրեն ողջ երկրի տարածքում հրադադարի հաստատման համար, սակայն ԻՊ-ի հետ հրադադար չի կնքվելու:

 Բանակցության մասնակիցներն ընդհանուր առմամբ գոհ են եղել արդյունքից, սակայն ուշագրավ է, որ կողմերը համաձայնության չեն եկել նախագահ Բաշար Ասադի հետագա ճակատագրի հարցում:

Ինչպես հայտնում է «Ինտերֆաքսը», Ասադի դերը կոնֆլիկտի լուծման ընթացքում շարունակում է մնալ բանակցությունների մեխը, կոնկրետ Սաուդյան Արաբիան շարունակում է անդրդվելի մնալ` պահանջելով, որ Ասադը կարգավորման գործընթացից դուրս մնա: