Խոդորկովսկին ներման խնդրագիր է գրել

Ռուսական ЮКОС նավթային ընկերության նախկին ղեկավար Միխայիլ Խոդորկովսկին ներման խնդրագիր է գրել հատուկ ծառայությունների աշխատակիցների հետ զրույցից հետո։ Այս մասին հայտնում է Коммерсантъ-ը՝ վկայակոչելով իր անանուն աղբյուրները:

Վերջերս կալանավորին  հայտնել են քաղցկեղով հիվանդ մոր վիճակի վատթարացման և նոր քրեական գործի մասին, որը շուտով կհարուցվի։ Ըստ թերթի՝  հենց այս զրույցը, որն անցկացվել է առանց փաստաբանների, ստիպել է Խոդորկովսկուն ներման խնդրագիր գրել ՌԴ նախագահին:

Հիշեցնենք, որ  ՌԴ նախագահ Վլադիմիր Պուտինը երեկ ասուլիսի ժամանակ հայտարարել է, որ իր խնդրագրում Խոդորկովսկին «հիմնվում է մարդասիրական բնույթի հանգամանքների վրա», նաեւ նշել, որ ներում շնորհելու մասին խնդրագիրը կընդունվի մոտ ապագայում։

Խոդորկովսկին ձերբակալվել է 2003-ին։ Երկու տարի անց նա դատապարտվել է 9 տարվա ազատազրկման՝ հարկեր չվճարելու և խարդախության մեղադրանքով։