Մարդկանց ձեռնտու է իներտ վիճակը. Հաղթանակ Շահումյան

Երեկ Նկարիչների միության համագումարն էր, որը վերընտրեց նկարիչների միության նախագահ Կարեն Աղամյանին: Միության նախագահի հավանական թեկնածուների շարքում էր նաեւ նկարիչ Հաղթանակ Շահումյանը, որը, սակայն, նախագահ դառնալու ցանկություն չունեցավ:

Ավելին, երբ նա առաջարկով հանդես եկավ` ստեղծել համանախագահների խորհուրդ, իսկ դրան ի պատասխան, Նկարիչների միության նախագահը հեգնեց, թե միգուցե երկրում էլ մի քանի նախագահ, վարչապետ եւ ռեկտորներ ունենանք, պարզապես դուրս եկավ դահլիճից:

Yerkir.am-ի հետ զրույցում Շահումյանը նշեց, որ իր առաջարկը` ունենալ համանախագահների խորհուրդ, կնպաստեր, որ խախտումները պակասեին, ասենք` ընտրությունների ժամանակ. «Կարծում եմ` ճիշտ կլիներ, որ երեք մարդ լիներ համանախագահ, որոնք տարբեր հայացքներ կունենային, եւ, այսպիսով, կվերահսկվեր նաեւ միության գործունեությունը: Հեռացա դահլիճից, քանի որ հասկացա, որ այստեղ ոչինչ փոխել հնարավոր չէ. մարդկանց ձեռնտու է իներտ վիճակը»:

Շահումյանը կարծում է, որ միությունը չպետք է շարունակի աշխատել նույն ոճով, հակառակ դեպքում` ոչինչ սպասել պետք չէ միությունից. «Ես եղել եմ վարչության անդամ եւ փաստում եմ, որ գրեթե ոչ մի հարց վարչությունը չի լուծում»: