Վիլնյուսից հետո պարզ կլինի հետագա ընթացքը. ՀՀ-ում ԵՄ պատվիրակության ղեկավար

«Վարշավայից դեպի Վիլնյուս խաչմերուկներում» թեմայով հանրային քննարկման ժամանակ ներկայացվեցին Արևելյան գործընկերության ճանապարհային քարտեզի` 2012-2013թթ. Հայաստանում և Վրաստանում անցկացված մոնիթորինգի արդյունքները: Հայաստանում ԵՄ պատվիրակության ղեկավար Տրայան Հրիսթեան նշեց, որ դեռ 2009թ. մայիսից ԵՄ-ն սկսել էր Հայաստանի հետ Արևելյան գործընկերության աշխատանքները` փորձելով ապահովել Հայաստանի տնտեսական ու քաղաքական ինտեգրման, ինչպես նաև եվրոպական ժողովրդավարական արժեքների ինտերգրման աշխատանքները: Այդ աշխատանքները, ըստ նրա, նախատեսում էին նաև շարժունակություն ԵՄ և այն վեց շահառու պետությունների միջև, որոնք ներգրավված էին այդ ինտեգրացիոն գործընթացներում:

Տրայան Հրիսթեան նշեց, որ շուտով` նոյեմբերի 28-29-ին, Վիլնյուսում կկայանա գագաթաժողով, ուր պետք է քննարկվի վերջին երկու տարիների` Հայաստան-ԵՄ աշխատանքները և հեռանկարները, որով էլ պարզ կլինի հետագա ընթացքը:

«Վիլնյուսի գագաթաժողովը պետք է արձանագրի կարևոր զարգացումներ, այն է` ԵՄ-ն պատրաստ է Մոլդովայի և Վրաստանի հետ ստորագրել Ասոցացման համաձայնագիր, իսկ ինչ վերաբերում է Հայաստանին, ապա վավերացվել են հետընդունման համաձայնագրեր, որովհետև ԵՄ-ն հաշվի է առել Մաքսային միությանը միանալու` Հայաստանի ցանկությունը: Չնայած այն հանգամանքին, որ մենք Խոր և համապարփակ ազատ առևտրի գոտու ձևավորման ուղղությամբ իրականացրել էինք մի քանի տարվա աշխատանք, բայց ԵՄ-ն հարգում է Հայաստանի ինքնիշխանության ու ինքնորոշման իրավունքը»,- ասաց Հայաստանում ԵՄ պատվիրակության ղեկավարը` հավելելով, որ չնայած ՄՄ-ին Հայաստանի անդամակցությանը, ԵՄ-ն կաջակցի Հայաստանում մարդու իրավունքների ոլորտում իրականացվող բարեփոխումներին, թեև այդ բարեփոխումների իրավակիրարկումը մնում է թերի:

Նա նշեց, որ Վիլնյուսի գագաթաժողովից հետո ԵՄ-ն կփորձի գտնել Հայաստանի հետ հետագա համագործակցության այնպիսի ուղիներ, որոնք կհամապատասխանեն Հայաստանի արտաքին քաղաքական ուղղվածությանը: