Հանդիպման ավարտից հետո ամեն ինչ պարզ կլինի. Ծառուկյանի թիմակիցները սպասողական վիճակում են

Հայտնել ենք, որ այս պահին ընթանում է Գագիկ Ծառուկյանի և «Ծառուկյան» դաշինքի անդամների հանդիպումը:

«Ծառուկյան» դաշինքի ներկայացուցիչները շտապում են դաշինքի ղեկավար Ծառուկյանի հետ հանդիպմանը, որի ընթացքում քննարկվելու է պաշտոնների բաշխման հարցը:

Գյումրու նախկին քաղաքապետ, «Ծառուկյան» դաշինքից պատգամավոր ընտրված Վարդան Ղուկասյանը, իջնելով մեքենայից, շտապեց բարձրանալ այն վայրը, որտեղ տեղի է ունենալու հանդիպումը: Իսկ մինչ այդ` նա լրագրողներին հորդորեց հանգիստ լինել և սպասել հանդիպման ավարտին: Ղուկասյանը շրջանցեց իր որդու հետ տեղի ունեցած միջադեպի մասին հարցերը և կրկին հորդորեց սպասել:

Լրագրողների հարցերից խուսափեց նաև Արարատ Զուրաբյանը: Նա միայն բարևեց լրագրողներին և չցանկացավ պատասխանել որևէ հարցի:

Իսկ դաշինքից պատգամավոր ընտրված Նապոլեոն Ազիզյանն էլ, մինչ Ծառուկյանի հետ հանդիպման գնալը,  լրագրողներին ասաց, որ ինքը ցանկանում է պահպանել մանդատը, քանի որ ժողովուրդն է իրեն տվել այն: Սկզբում նա ասաց, որ մանդատի հարց չի քննարկվելու, ապա ավելացրեց` հանդիպման ավարտից հետո ամեն ինչ պարզ կլինի: