Պետք է վերադարձնեմ WBO վարկածով գոտիս, որ գիշերները հանգիստ քնեմ. Արթուր Աբրահամ

Նոյեմբերի 20-ին «Ուրբաթ» ակումբում լրագրողների հետ հանդիպման ժամանակ պրոֆեսիոնալ բռնցքամարտի սուպերմիջին քաշային կարգում աշխարհի նախկին չեմպիոն Արթուր Աբրահամը խոսել է փետրվարի 1-ին կայանալիք` Ռոբերտ Շտիգլիցի դեմ ռևանշ մենամարտի մասին:

«Այդ մենամարտն այս պահին  իմ կյանքի ամենակարևոր մենամարտն է:  Այն կկայանա փետրվարի 1-ին Գերմանիայում, սակայն քաղաքը դեռ ընտրված չէ: WBO վարկածով գոտին այն գոտին է, որը յուրաքանչյուր բռնցքամարտիկ երազում է ունենալ: Պետք է վերադարձնեմ այն, որպեսզի գիշերները հանգիստ քնեմ: Ջովանի դե Կարոլիսի հետ մենամարտի մասին կասեմ, որ կարևորը` հաղթեցի: Անցումային մենամարտ էր: Պրոֆեսիոնալ կարերիաս երևի կավարտեմ 35 տարեկան հասակում, իսկ մարզչական կարերիայի մասին խոսելը դեռ վաղ է»,- ասաց բռնցքամարտիկը:

Արթուր Աբրահամը խոսեց նաև Վիկ Դարչինյանի և ֆիլիպինցի Նոնիտո Դոների միջև մենամարտի մասին. «Ցավում եմ, որ մենամարտը այդպես ստացվեց: Սպորտ է, ամեն ինչ էլ պատահում է»:

Նոյեմբերի 20-ին Արթուր Աբրահամը ներկա կլինի Ներքին Չարբախի թիվ 99 դպրոցի մարզական ակումբի բացմանը: Դպրոցի մարզադահլիճում կբացվի Արթուր Աբրահամի անունը կրող անկյուն: