Փորձաքննությունը հաստատել է Հրաչյա Հարությունյանի մեղքը

Արդեն հայտնել ենք, որ երեկ Ռուսաստանի ՆԳՆ-ն ստացել է Հրաչյա Հարությունյանի գործով հոգեբուժական և ավտոտեխնիկական փորձաքննությունների արդյունքները: Հրաչյա Հարությունյանը և նրա դատապաշտպանը փորձաքննության արդյունքներին ծանոթացել են այսօր:

Այսպիսով՝ փորձաքննությունը ապացուցել է Հրաչյա Հարությունյանի մեղքը Մերձմոսկվայում տեղի ունեցած վթարում: Ըստ փորձաքննության՝ Հարությունյանի գործողություններում ճանապարհային երթևեկության կաննոների և մեքենայի շահագործման խախտում է հայտնաբերվել: Բացի այդ` հայտնի է դարձել, որ նրա վարած բեռնատարը երկար ժամանակ չի անցել տեխնիկական սպասարկում: «Դա հանգեցրել է նրան, որ մեքենայի  արգելակող համակարգն արդյունավետ չի աշխատել, ինչի մասին մեղադրյալը պետք է տեղյակ լիներ»,- նշվում է ՆԳՆ-ի հայտարարությունում:

Հիշեցնենք, որ հուլիսի 13-ին Մերձմոսկվայում Հրաչյա Հարությունյանի վարած բեռնատարը բախվել էր ուղեւորատար ավտոբուսին, ինչի արդյունքում զոհվել էր 18 մարդ: Հարությունյանը հրաշքով էր փրկվել: