Պերմյակովի դատահոգեբանական-դատահոգեբուժական փորձաքննությունը՝ այսօր

Ժամեր անց Գյումրիում տեղակայված 102-րդ ռազմաբազայում տեղի կունենա Ավետիսյանների ընտանիքի 7 անդամների սպանության մեջ մեղադրվող Վալերի Պերմյակովի նկատմամբ նշանակված դատահոգեբանական եւ դատահոգեբուժական համալիր փորձաքննությունը: Փորձաքննությանը ներկա կգտնվեն Ավետիսյանների իրավահաջորդների ներկայացուցիչներից Երեմ Սարգսյանը, Լուսինե Սահակյանը և Միհրան Պողոսյանը:

Հիշեցնենք, որ Պերմյակովի նկատմամբ նման փորձաքննություն նշանակել էր ռուսական կողմը: Գյումրիի ռուսական կայազորի դատարանում Պերմյակովի դասալքության, նրա կողմից զենքի հափշտակության և կրելու գործով նիստի ընթացքում հրապարակված դատահոգեբուժական, դատահոգեբանական համալիր փորձաքննության եզրակացության համաձայն` Պերմյակովի մոտ հոգեկան առողջության հետ կապված խնդիրներ չկան: Նա ագրեսիվ վարք ու թմրանյութերից կախվածություն չունի և պիտանի է ծառայությանը:

Սակայն նիստին ներկա` Ավետիսյանների իրավահաջորդների ներկայացուցիչները նկատել էին, որ Պերմյակովի վարքը տարօրինակ է: «Ռուսական կողմի դատաքննության ընթացքում Պերմյակովը ցուցմունք չէր տալիս, որևէ բան չէր խոսում, նրա պահվածքը շատ տարօրինակ էր: Նրա պահվածքն այնպիսի հետևության է հանգեցնում, որ նա, միանշանակ, որոշակի խնդիրներ ունի»,- ասել էր իրավահաջորդներից մեկի փաստաբան Լուսինե Սահակյանը: