Երևանում դանակահարել են սիրիահայ երիտասարդների

Նոյեմբերի 17-ին` առավոտյան 5-ի սահմաններում,  դանակահարություն է տեղի ունեցել երևանյան «Լոնդոն» բարում: Դանակահարվել են ակումբի աշխատակիցներ Շանթ Քոչյանը և Րաֆֆի Բարդաքչյանը (լուսանկարում):

Yerkir.am-ին ոստիկանությունից հայտնեցին, որ դեպքի առթիվ ոստիկանության Կենտրոնականի բաժնում նախաքննություն է ընթանում, նշանակվել է դատաբժշկական փորձաքննություն, հանգամանքները պարզվում են:

Yerkir.am-ի տեղեկություններով` դանակահարված երիտասարդներն ակումբի աշխատակիցներ են` սիրիահայեր:

Մեր աղբյուրի համաձայն` դեպքի օրը 5 երիտասարդներ ոգելիչ խմիչքի ազդեցության տակ վիճաբանություն են սկսել ակումբի տիրոջ հետ և փորձել դանակահարել նրան, ինչը փորձել են կանխել ակումբի սիրիահայ աշխատակիցները:  Արդյունքում վնասվել է Շանթի ձեռքը, իսկ Րաֆֆի Բարդաքչյանը մեջքից դանակի հարված է ստացել:

Այս պահին երկուսն էլ գտնվում են Առաջին համալսարանական հիվանդանոցում: Րաֆֆի Բարդաքչյանին երեկ վերակենդանացման բաժանմունքից տեղափոխել են հիվանդասենյակ:

Մեր տեղեկություններով` հանցագործությունը կատարած երիտասարդները դեռևս չեն հայտնաբերվել: