Արամ Մանուկյանը Հրայր Թովմասյանի մոտ մանկական բաներ է նկատում

ՀԱԿ խմբակցության քարտուղար Արամ Մանուկյանն «աննորմալ»  որակեց կենսաթոշակների պարտադիր կուտակային համակարգին անցնելու` կառավարության որոշումը: «Վարչապետն ուզում է ապահով ծերություն ապահովել մեզ համար, բայց ես կարող ա չեմ ուզում, կարող ա 5 տարի հետո գնում եմ Հայաստանից»,- ասաց նա:

Մանուկյանը հայտարարեց, որ բյուջեի նախագծին դեմ է քվեարկելու: «Բյուջե չկա, նրանց համար մեկ ա, քյաբաբից ու խաշից այն կողմ իրանց կյանքը չեն պատկերացնում, թերթ էլ չեն կարդում, ռադիո էլ չեն լսում, որ տեսնեն` ինչ է երկրում կատարվում, նրանք չեն մտածում ժողովրդի սոցիալական վիճակի մասին»,- ասաց նա:

Անդրադառնալով ՀԱԿ պատգամավոր Նիկոլ Փաշինյանի և «Ժառանգություն» խմբակցության ղեկավար Զարուհի Փոստանջյանի` երեկ «Նուբարաշեն» ՔԿՀ կատարած անհաջող այցին, պատգամավորն ասաց. «Օրենքները հստակ թույլ են տալիս պատգամավորներին անարգել այցելել ցանկացած վայր: Աբսուրդ է գնալ կալանավայր, բայց հանդիպել սենյակի հետ»:

Նշենք, որ երեկ ընդդիմադիր պատգամավորները փորձել էին տեսակցել նոյեմբերի 5-ին Երեւանի կենտրոնում տեղի ունեցած անկարգությունների գործով կալանավորվածներին, սակայն նրանց թույլ չէին տվել:

«Դա Հրայր Թովմասյանի կամակորության դրսևորումն է: Չնայած երեկ խորհրդարանում իրեն շատ լավ էր պահում, ես նրա մոտ մանկական բաներ եմ նկատում. ինչքան ջահել են, այնքան քծնանքը շատ է»,- նշեց ՀԱԿ պատգամավորը: