Ես չեմ ուզում ապացուցել, որ իմ երեխայի հայրը ես եմ. Ռոբերտ Ամիրխանյան

Կոմպոզիտորների միության համագումարում միության նախագահ Ռոբերտ Ամիրխանյանը ելույթի միջոցով ամփոփեց վերջին տարիներին միության կատարած աշխատանքը:

Ըստ նրա` ճիշտ է, նախորդ համագումարին իրենք չընտրեցին վարչություն, քանի որ համագումարը բոյկոտեցին միության որոշ անդամներ, իսկ այն, որ վերջին 4 տարվա ընթացքում իրենք համագումար չեն արել, լավ օրից չէ:

«Ինձ մեղադրում են, թե 22 տարվա ընթացքում ոչինչ չի արվել: Մի՞թե այս ընթացքում մենք որեւէ լավ բան չենք արել: Եթե արել ենք եւ վատ է ստացվել, ընդունում եմ: Սակայն այս դեպքում գայիք եւ օգնեիք մեզ, այլ ոչ թե կանգնեիք միությունից շատ հեռու եւ, չվճարելով անդամավճարները, մեղադրեիք ինձ ինչ-որ հարցում»,- ասաց Ամիրխանյանը` հավելելով, որ իրենց արած աշխատանքի լուսավոր կետերը չտեսնելն ուղղակի դիտավորություն է:

Այնուհետեւ նա տեղեկացրեց, որ այս ընթացքում միությունն ունեցել է 12 համերգ, որոնց ժամանակ հնչել են շուրջ 45 հեղինակների ստեղծագործություններ, ընդ որում` դրանցից 21-ը եղել են նոր գրված գործեր:

Ամիրխանյանը զարմացած է` պնդում են, որ «երիտասարդներին տեղ չի տալիս» այն դեպքում, երբ երիտասարդների գործերը մշտապես հնչել են իրենց աշնանային եւ գարնանային համերգաշարերում:

«Ասում են` «Երազ իմ երկիրը» ես չեմ գրել, մինչդեռ ես չեմ ուզում ապացուցել, որ իմ երեխայի հայրը ինքս եմ: Ես ոչինչ չունեմ ապացուցելու, եթե որեւէ մեկը ցանկանում է հակառակն ապացուցել եւ կարող է դա անել, խնդրեմ, ես դեմ չեմ: Հերիք է սեւացնեք իրար, թափեք ձեր սիրտը ինչքան կարող եք, վերջը գալու եք բարության սկզբունքներին»,- ասաց Ամիրխանյանը` հավելելով, որ ինքը պատրաստ է հեռու քաշվել, եթե համոզվի, որ խանգարում է միությանը.«Կյանքը տրված է կյանքին դիմանալու համար: Ես կհեռանամ, եթե զգամ, որ միայն խանգարում եմ: Սակայն դուք պատկերացնո՞ւմ եք` ի՞նչ ասել է միություն պահել, եւ որտեղի՞ց եք այդ գումարները հայթայթելու»:

Ելույթից հետո yerkir.am-ի հետ զրույցում Ամիրխանյանը հերքեց կոմպոզիտոր Արամ Սաթյանի այն տեղեկությունը, որ վերջին օրերին Կոմպոզիտորների միության շարքերը համալրվել են. «Սուտ է»: