Հայատանում արտահանումն արդեն կապահովագրվի

Կառավարությունն այսօր որոշեց հիմնադրել «Արտահանման ապահովագրական կազմակերպություն» ՓԲԸ: Այս կազմակերպության հիմնումը, ինչպես ներկայացնելու ժամանակ նշեց էկոնոմիկայի նախարար Վահրամ Ավանեսյանը, արտահանման քաղաքականությանն ուղղված քաղաքականության ենթակառուցվածքային կարեւորագույն օղակներից մեկն է լինելու:

«Այսօր մենք  նաեւ Համաշխարհային բանկի հետ ենք բանակցություններ վարում, որպեսզի հաջողությամբ այս նախագիծն իրագործենք արդեն 2014 թվականից»,- նշեց Վահրամ Ավանեսյանը:

Այսպիսով' Կառավարության ընդունած նախագծով սահմանվեց ընկերության ընդհանուր կապիտալը' 1 միլիարդ 950 միլիոն դրամ, որից կանոնադրական կապիտալը' 1 միլիարդ 500 միլիոն դրամ, որը համապատասխանում է 150 հազար հատ հասարակ բաժնետոմսի, յուրաքանչյուրը' 10 000 դրամ անվանական արժեքով, եւ ընկերության գլխավոր պահուստ' 450 միլիոն դրամ:

Ընկերության պետական սեփականություն հանդիսացող 100 տոկոս բաժնետոմսերի փաթեթի կառավարման լիազորությունը` ձայների հավասար իրավունքով, վերապահվում է Հայաստանի Հանրապետության էկոնոմիկայի, ֆինանսների, արտաքին գործերի, գյուղատնտեսության, էներգետիկայի և բնական պաշարների նախարարություններին' լիազոր մարմնին:

Կառավարությունը լիազոր մարմնին լիազորեց հիմնադրի անունից հաստատել ընկերության կանոնադրությունը:

Լիազոր մարմնին ու ՀՀ նախագահի աշխատակազմին լիազորվեց հիմնադրի անունից ձևավորելու ընկերության Խորհուրդը եւ դրանում կատարելու փոփոխություններ ու նշանակելու գործադիր մարմնի ղեկավարին եւ դրա անդամներին: Լիազոր մարմինը ստացավ նաեւ հիմնադրի անունից ընկերության հիմնադրի եւ հետագայում նաև Ընդհանուր ժողովի բոլոր իրավասությունները իրականացնելու լիազորություններ: