ԼՂՀ-ում է Ադրբեջանի պաշտպանության նախարարի նախկին տեղակալը

Լեռնային Ղարաբաղի Հանրապետությունում  է Ադրբեջանի պաշտպանության նախարարի նախկին տեղակալ, ազգությամբ թալիշ Ալիքրամ Հումաթովը: 1992-1993 թթ. լինելով Ադրբեջանի պաշտպանության նախարարի տեղակալ` ակտիվ մասնակցություն է ունեցել ադրբեջանա-ղարաբաղյան պատերազմին, սակայն այսօր Արցախում է, ինչպես ինքն է նշում` «տղամարդավարի կռվել է, հիմա էլ եկել է տղամարդավարի հաշտության ձեռք մեկնելու»:

«ԼՂՀ հռչակումը լավ օրինակ կարող է ծառայել թալիշների համար: Ապրելով մեր պատմական հողերում` այսօր մենք ոչ մի իրավունք չունենք, չունենք ուսումնական հաստատություններ, մեր երեխաներից շատերը չգիտեն մեր լեզուն, եւ հետզհետե ձուլվում ենք: Այսօր Ադրբեջանում ապրող թալիշները  ենթարկվում են ազգային  խտրականությունների, մասնավորապես` հայ-ադրբեջաական սահմանին հիմնականում ծառայում են թալիշները, թալիշների համար աշխատանք գտնելը շատ ավելի դժվար է, մեծ թվով թալիշներ պարզապես արտագաղթում են: Դա հատուկ է արվում Ադրբեջանի կառավարության կողմից` թալիշների հարցին պարզապես վերջ դնելու նպատակով»,- aparaj.am-ին ասել է Ալիքրամ Հումաթովը:

Նա չի թաքցրել իր հիացմունքը` հույս հայտնելով, որ այլեւս պատերազմ չի լինի եւ տարածաշրջանում վերջնական խաղաղություն կհաստատվի:

Ալիքրամ Հումաթովը  Ադրբեջանում մի քանի անգամ ձերբակալվելուց հետո քաղաքական ապաստան է ստացել Հոլանդիայում, այժմ էլ բնակվում է այնտեղ: