Սարգսյանական անակնկալները շարունակելի են

Ամենայն հավանականությամբ, այս հինգշաբթի` ՀՀԿ ԳՄ նիստից հետո, կհրապարակվի նոր գլխավոր դատախազի անունը:

Մինչ այս այդ պաշտոնի բազմաթիվ թեկնածուների անուններ շրջանառվեցին` ամենատրամաբանականից մինչեւ ամենաանհեթեթ: Իր գործողությունների գաղտնապահությամբ եւ ամեն ինչ թիմակիցներին վերջին պահին հայտնելու գործելաոճով հայտնի Սերժ Սարգսյանը դատախազի նշանակման հարցում մինչեւ այս պահն էլ շարունակում է ինտրիգի մեջ պահել թե' հանրությանը եւ թե' իշխանության ներկայացուցիչներին, անգամ` ամենամտերիմներին:

Մի բան Սերժ Սարգսյանը օրերս, սակայն, հստակեցրել է. ակնարկել է, որ ԱԱԽ քարտուղար, ՕԵԿ նախագահ Արթուր Բաղդասարյանին այդ պաշտոնում չի նշանակի: Պատճառն այն չէ, որ սոցցանցերում աղմուկ կբարձրանա, եւ ոմանք հերթական անգամ կզարմանան նախագահի քայլերից, այլ այն, որ առանց այն էլ մի կերպ պահվող, «Օրինաց երկիր» կոչվող կուսակցությունը Բաղդասարյանից հետո կվերանա: Մինչեւ նոր քաղաքական զարգացումները ՀՀԿ-ն ՕԵԿ-ի հետ կոալիցիա-կոալիցիա դեռ պետք է խաղա դրսի եւ ներսի համար:

Ի դեպ, Yerkir.am-ի թղթակիցը օրերս երբ Արթուր Բաղդասարյանի հետ փորձել է խոսել այդ թեմայով, նա անտրամադիր հայտարարել է, որ նման բան չկա:

Սերժ Սարգսյանի գործողությունները եւ քայլերը քիչ, թե շատ կշռադատել եւ ծանր ու թեթեւ  անել կարողացողները ասում են, որ, ամենայն հավանականությամբ, Սերժ Սարգսյանն անակնկալ է մատուցելու եւ նշանակելու է մի այնպիսի մարդու, որի մասին մինչ այժմ որեւէ մեկը չի գրել եւ խոսել: Ոմանք էլ պնդում են, որ նախագահը կանգ է առել ՀՔԾ պետ Վահրամ Շահինյանի թեկնածության վրա:

Ի դեպ, նախկին գլխավոր դատախազ Աղվան Հովսեփյանի համար, մեր տեղեկություններով, Սերժ Սարգսյանը ուժային նոր կառույց է ստեղծելու, իսկ ավելի ճիշտ` առանձնացնելու: Ուշագրավ է, որ այն իր ունեցած առավելություններով եւ իրավունքներով գրեթե կիսով չափ կրճատելու է գլխավոր դատախազության դերն ու նշանակությունը: