Տնավարի սպասելիքներ` Ռուսաստանից

Այսօր նախագահ Սերժ Սարգսյանը աշխատանքային այցով մեկնելու է Ռուսաստանի Դաշնություն, որտեղ կհանդիպի իր գործընկերոջ` Վլադիմիր Պուտինի հետ:

ՀՀ մարդու իրավունքների առաջին պաշտպան Լարիսա Ալավերդյանի կարծիքով,  սակայն,   մեր նախագահի այցը կանխորոշված և պարտադրված է: Երկու երկրների նախագահների կողմից ԱՊՀ տարածքում ինտեգրման գործընթացներին և Հարավային Կովկասում անվտանգության ու կայունության ապահովմանը վերաբերող հարցերի քննարկումը, ըստ նրա, որևէ կտրուկ փոփոխության չի հանգեցնի: Փոխարենը Լարիսա Ալավերդյանը կարծում է, որ  Հայաստանը պետք է կարողանա  տարածաշրջանում ստեղծված իրավիճակում ճիշտ կողմնորոշվել և որոշակի հմտություններ ցուցաբերել, որի բացակայությունն այսօր ակնհայտ է: 

Նախկին օմբուդսմենին չի մտահոգել  Պուտինի այցը Բաքու: Ըստ նրա` ժամանակն է դադարեցնել տնավարի մակարդակի սպասելիքները ՌԴ-ից և հասկանալ, որ այդ երկիրը խոշոր խաղացող է, և փորձել  ինքնուրույն գործել:

Իսկ  Ռուսաստանի կողմից Ադրբեջանին զենք վաճառելու փաստը, ըստ Ալավերդյանի, երկու երկրների նախագահների քննարկման առարկա չի դառնա: