"Տնավարի" հեռախոսազրույց

ԱՄՆ նախագահ Բարաք Օբաման Ֆրանսիայի իր պաշտոնակից Նիկոլա Սարկոզիի, Մեծ Բրիտանիայի եւ Իտալիայի վարչապետեր Դեւիդ Քեմերոնի եւ Սիլվիո Բեռլուսկոնիի հետ հեռախոսազրույցների ընթացքում քննարկել է անկարգությունների ասպարեզի վերածված Լիբիայի նկատմամբ կիրառվելիք գործողությունների զանազան տարբերակներ:

«Ղեկավարները հավաստիացրել են, որ պաշտպանում են Լիբիայի ժողովրդի հիմնարար, այդ թվում` ժողովներ անցկացնելու, խոսքի ազատության եւ իր ճակատագիրը տնօրինելու իրավունքները: Նրանք համակարծիք են, որ դրանք պետք է հարգվեն: Ղեկավարները նաեւ քննարկել են Լիբիայի կառավարությանը պատասխանատվության ենթարկելու մի շարք տարբերակներ: Նրանք պայմանավորվել են իրադրության զարգացմանը զուգահեռ շարունակել ինտենսիվ խորհրդատվությունները»,- ասվում է Սպիտակ տան հաղորդագրության մեջ:

Օբաման իր գործընկերների հետ զրույցների ընթացքում ընդգծել է, որ խորապես անհանգստացած է Լիբիայում մոլեգնող բռնություններից, եւ հայտարարել է, որ անհրաժեշտ է այդ երկրի իշխանությունների նկատմամբ շուտափույթ միջոցներ ձեռնարկել: